Dai ni na Ja Chyum Mungga hpe anhte hti sum ru yu ai shaloi e, Karai Kasang a nsen hpe na ai hte pi Nat tsadan gaw, dik hkra hkrit kajawng hprawng mat ma ai. Madu Yesu moi shi sak hkrung hkawm sa ai ten ni hta, tara jawng ni hkan e, Nat kap ai ni, machyi masha ni hpe, shi shamai shatsai ya lai wa sai. Dai zawn sha, anhte marai hkum shagu hpe mung, Karai Kasang gaw Healing power ngu ai shamai shatsai ya lu ai chyeju a tsam yawng hpe jaw da ya ai re. Shingrai, ndai chyeju hpe anhte yawng hkan lang akyu jashawn lu na matu gaw, madu hkum nan sha madung rai nga ai. Dai Karai Kasang a chyeju kum hpa hpe tinang hkum nan a Karai Kasang kaw matut mahkai ai wenyi n`gun atsam hta madung re hpe mu chye hkap la lu ai. Ndai lam hte seng nna, mahkrum madup law law nga na re. Shara mi hta nat shang nna, machyi taw ai hpe sara shaga nna, nat gawt kyu hpyi ya na matu sara wa shang wa yang e, dai nat kap machyi taw nga ai wa gaw, dai sara wa hpe mu jang mani jahtau let nga ai rai ni hte hta kabai shachyut ai majaw, sara wa mung hprawng pru mat ai. Ndai zawn re ai mabyin ni gaw anhte a makam masham wenyi n`gun hte mung seng nga ai. Dai majaw, ten shagu Karai Kasang hta manoi manat kam hpa shingbyi ai lam hta shakut sa nga ga law.
