Daini na Ja Chyum Mungga hpe anhte hti sum ru yu ai shaloi e, masha a lam hpe masha shada sha tsun ginlen ya lu ai zawn, nam pu nam pan ni a sama hpe mung, nam pu nam pan ni hku na sha, nam pan sama hpe lu la mai nga ai nga ai re. Shiga madat nu wa hpu nau ni, anhte kalang lang shinggyim masha ni a mai kaja ai lam, galu kaba awng dang ai lam ni hpe e, tsun shakawn ya na, n`gun jaw ai ga si ni hpe n gup a ga kaw na tsun shapraw na matu grai yak la chye ga ai n rai a ni.
Ya daini Madu Yesu gaw, ndai manggang kap ai wa hpe e, Madu Yesu shi shamai ya ai lam kadai hpe mung n tsun na matu ga ginhtim da u ai. Raitim mung Madu Yesu a mai kaja ai magam lam hpe, ndai manggang kap ai wa gaw, n tsun nna nan n nga lu sai lam na chye lu ga ai. Shingrai anhte nang ngai mung Madu Yesu a mai kaja ai lam, tengman ai Karai Kasang re ai lam hpe, makau grupyin hta htawn tsun sakse hkam na lit nga ai re hpe dum let, shi Madu a sasana magam lam ni hta ang wa ai ten hta e, n hprai ai sha, ap nawng daw jau gun hpai sa lu hkra shakut hkawm sa nga ga law.
