Dai ni na Ja Chyum Mungga hpe anhte hti sum ru yu ai shaloi e, lai wa sai ten hta na, hkristan hpung masha ni a mau na zawn re ai. makam masham myit ni hpe dai ni anhte hpe bai lam madun sharin shaga ya nga ai hpe mu chye la lu nga ga ai. Kalang mi hta salang wa ngan langai mi gaw, laban shani shagu nawku sa ai shaloi nawku jawng kata de grai chyat ai majaw, shinggan kaw sha sa dung dung rai nna wa wa sha a rai nga ai.
Shingrai hpa tsun ai mung atsawm sha nna la, n chye la rai lani hte lani gaw, shanhte a kun dinghku dum nta kata kaw e, mayak mahkak gali galaw, n ru n ra rai,manghkang ni law she law byin wa sai. Dai majaw kawa hpe akyu hpyi shakut ra ai. Nawku jawng lung yang mung, nawku jawng kata de masha ni zawn shang nna, myit lawm ai hte hput di ap nawng shakut hpyi ra ai. ngu tsun tim n kam hkap la ai.
Gara kaw na mi rai rai, nawku jawng wang e rai jang gaw shaman chyeju lu sai, nga sha tsun ai majaw, rai yang e, nang shat kaw sin nna, sha ku kaw zim sha dung taw yang, kan de shat hku wa ai kun? Lata hte shat hta bang yang she kan hkru wa ai n rai ni? Dai zawn sha re madu nan ap nawng daw jau ra nga ai. Ya ndai chyum mung ga hte maren, hkum katsing si ai wa hpe kaga masha ni Yesu kaw du hkra lam amyu myu hku ladat shaw shakut woi sa ya ai majaw, shamai shatsai ai chyeju hkam la lu sai rai nga ai. Dai zawn sha, anhte yawng mung, shi Madu kaw sit shang lu hkra lam amyu myu hku ladat shaw shakut sa nga ga law.
