Hkristu hta tsawra hkungga ai nu wa hpu nau ni ndai laban gaw Shingning C a Pranwan Ladaw Lahkawng rai nga ai. Yawhan 2:5 raitim mung shi a kanu gaw shi nanhte hpe tsun matsun galaw mu ngu nna shangun ma ni hpe tsun da nu ai.
Mabyin lam langai mi hpe tsun dan mayu ai moi kalang mi hta matsan ai dingla langai gaw nta ni hkan hpyi sha hkawm let mare e nga ai manam jarawp langai mi hta shanu shingbyi nga ai lam rai nga ai. Shi gaw shara shagu hkan hpyi sha hkawm nga tim shi shanu nga ai shara hpe gaw galoi mung jasan jaseng nna lai wa lai sa masha ni myit pyaw ai hte dai manam jarawp hta shanu lu na matu manam jarawp nta hpe yu gawn lajang rai nna nga ai lani mi hta shi hkum nan hpyi nna lu wa ai shanghpaw si hpe sha nna dai nam si a atum hpe dai nta grup grup hta hkai tawn da ai. Dai zawn hkai da ai nam si hpun gaw gau ngwi ngwi rai kaba wa nna shata tawng marang mi na ai hpang sanghpaw si si wa ai. Ang sha-a shi a mungdan na hkawhkawm a shangai nhtoi mung du wa ai hte hkrak rai nga ai. Shaloi shi mung dai si wa ai sanghpaw si ni hta na shawng myin ai nam si hpe shangai nhtoi ang ai hkawhkam hpe kum hpa hku nna wa sak jaw na re ngu nna myit tawn da ai. Shangai nhtoi du ai shani kaja wa mung dai matsan ai dingla gaw shi a nam si kum hpa hpe lang let masha ni zawn kumhpa sak jaw na matu dingren rai tsap ai shara hta tsap nang ai. Dai hku tsap nang yang shi a sak jaw na ten du ai shaloi dai kaw yu sin nga ai masha kaba gaw shi hpe hpang de bai sa kau kau di ai. Kalang sha mung nrai lang hte lang dai hku galaw taw ai . Dai hpe hkawhkam jan gaw mu kau nna shi hpang de sa wa let hpa baw byin ai lam san dat ai ten dai matsan ai masha mung mabyin lam hpe azin ayang tsun dan dat ai. Shaloi dai hkawhkam jan gaw rai sa na a sanghpaw si hpe ngai hkum nan ga nna hkawhkam wa hpe sak jaw ya na ngu nna ga sadi jaw let kaja wa mung galaw lai wa ai. Dai hpe sha ai hkawhkam wa mung ndai nam si grai mu nga ai kadai sak jaw a ta ngu nna san let dai sak jaw ai masha hpe shaga shangun dat nna dai matsan ai masha hpe kumhpa shagrau ya dat ai . Dai hpang kawn dai matsan ai wa mung dum nta hkau na ni hte rai grai lu su wa ai lam rai nga ai.
Tsawra ai nu wa hpu nau ni anhte yawng mung ya sha tsun lai wa sai mabyin na masha wa zawn myit masin sanseng let mai kaja ai nga na ahkyak ai. Anhte shinggyim masha ni gaw mara ni hte hpring nga ai hte gawng kya ai masha ni rai nga ai majaw Karai Kasang a man e kumhpaw kumhpa ni hpe sak jaw nga ai raitim Karai Kasang man e garai n du shi yang ding bai dingna ni a majaw htaw zawn le zawn rai byin nga ai ten kanu Maria kawn Madu Yesu hpang de du wa lu na matu bai kasha hkum nan mung mungkan ga hpe shi a kanu Maria lata hta ndai mungkan a kanu hku nna Udang ntsa e jen noi nga yang ap jaw da lai wa sai rai nga ai. Ndai mabyin lam hpe yu nna shi hkum nan jaw ya ai hkyehkrang la ai chyeju ngu na hpe hkam la shangun mayu ai a majaw shi a kaba la ai tsawra myit hpe mu lu nga ai.
Yawhan 2: 3-4 hta tsabyi ma mat jang Yesu a kanu gaw shanhte tsabyin n lu masai shaloi Yesu gaw num sha e ngai nang hte hpa seng a ta? Nye a ahkying garai n du li ai ngu nna htan wu ai.
Ndai jachyum daw hta Madu Yesu gaw shi a kanu hpe kanu ngu n shaga ai sha, Numsha e ngu nna shaga lai wa ai lam a majaw pyi laga hpu nau Hkristan hpung ni hta e Nu Maria hpe la hpa she n nga na daram tsun jahpoi asawng nga ma ai re.
Rai yang ndai chyum daw hpe yu yang Madu Yesu gaw shi a kanu Maria hpe mala shala hpyang ai hku na tsun dat ai lam rai mat kun ngu nna tsun na zawn rai nga ai. Dai hku kachyi mi mung n rai nga ai hpe tsun mayu ai.
Madu Yesu gaw shi a kanu hpe numsha e ngu nna n shaga ai sha Nu ngu nna jachyum mungga hta jahkring hkring sha shaga lai wa ai mahkoi mi rai yang hkye hkrang la ai labau gaw shawng hpang n ra mat na re. J chyum mungga na myihtoi ni a ga gaw hpring zup wa ai ngu nna mung lu tsun na n rai nga ai.shi Madu a ngup n gau kaw na pru wa ai ga si shagu gaw hkyehkrang la ai amu magam hpe shawng hpang hkrak rai na matu lachyum nga na matu tsun shapraw ai lam rai nga ai.
Ka da tawn da ai Ja chyum mungga ni hpe hka ja yu yang bai hkye hkrang la ai labau ting hpe hkaja dat yung yang mahkra dang chye ai Karai Kasang gaw masha langai ngai hpe jai lang sana nga yang mying madung ngu na hpe n shaga sai sha bungli hte seng ai amying hpe mahtang shamying shaga nna mying nnan bungli hte nawng rai ap nna shaga lai wa ai hpe mu lu ai.
Anhte Asia dan a masha ni a htung lai masa lam hpe yu yang masha kaba ni hpe mying gra rai nna shaga dat yang grai hpyang ai zawn rai nga ai. Shi a bungli lit magam ni hpe yu nna mying hpe tsun shaga yang she si mani ai zawn hkungga ai lam mung rai nga ai. Wa saradaw du kaba achyum aji,Wa jau, Sara ngu nna shaga tsun yang she si mani ai hte hkungga ai mung rai nga ai.
Ja chyum mungga hta Karai Kasang hkum nan mying nnan shamying nna bungli magam ap lai wa ai masha ni law law hpe mu lu ai. Npawt 17: 5 dai hta kaga na a amying hpe ya jaw nna Abram ngu lu na nrai ngai nang hpe masha amyu baw law law a kawa shatai sa de ai dai majaw na a amying abraham ngu na rai nga ai. Tsun mayu ai gaw Abram ngu ai lachyum gaw amyu kaba ai kaw na shangai wa ai ngu ai lachyum rai nga ai. Abraham ngu ai gaw grai kaba law htam ai masha uhpung uhpawng a kawa ngu ai lachyum rawng ai maga de galai shai kau ya nna makam masham hte htawm hpang kashu kasha ni a hpunda hte kasi la ging ai kawa hku nna sak hkrung lai wa ai a majaw daini e Abraham gaw Yuda amyu Musalin hte Hkristan ni yawng a matu makam a kawa ngu nna shaga shamying da hkrum nga ai.
Npawt 17:15 hta mung Abraham hpe Karai Kasang gaw na a madu jan Sarai hpe mung Sarai ngu shaga na nrai shi a mying sara ngu na rai nga ai. Npawt 30:10
Kasa laika hta hkristan ni hpe npawt pi nngam na daram hkan sat lai wa ai Salu gaw sara magup hkan gayin hkawm nna kam sham ai kashu kasha ni lawm htam wa hkra kabu gara shiga hpe hkaw tsun ai Pawlu ngu ai mying hte sasana amu gun hpai ai masha tai wa ai. Yawhan 1:42, Mt16:18
Madu Yesu gaw shi a nawku hpung hpe shi a gawng malai hku nna Kasa Petru hpe alak mi lit shatsam nna kasa Petru a ntsa gaw de lai wa ai. Dai majaw nawku hpung gaw tsa ban law law ni a lapran e ahtu adawt ai lam law law hkrum lai wa ai raitim nat tsadan gaw kachyi mi mung awng dang ai lam n nga lai wa ai.
Tsawra ai nu wa hpu nau ni ahkyak ai lit magam ni hpe shatsam ai ten hta mying ni hpe galai shai kau ya nna e mying nnan ni hte lit amu shatsam ya ai zawn anhte dum nta sun wang arung arai ni hpe sakse laika pa ni hte rau rai galai la sai nga yang madu tai wa nga ai. Maria ngu ai numsha hpe Karai Kasang gaw masha yawng a matu mu gun hpai nga ai hkye hkrang la ai magam lam hta e numsha ngu ai amying hpe jaw nna num ngu ai hte seng ai magam lam hku nna galaw gun hpai shangun nna numsha ngu ai amying shing teng hpe jaw nna shawng nnan na ga shaka hpe tawn nna jaw lai wa ai mying re ai hpe madi madun dat ai lam mung rai nga ai. Numsha e ngu ai ga si gaw Yuda myu sha n re ai anhte jasam masha ni a matu hkap la na matu yak tim yYuda myu sha ni a matu gaw hkye la Madu hpe shangai chyinghkai ya na hkye la Madu a kanu a Karai Kasang jaw ai jan mau ngu ai hpe chye da chyalu rai nga ai. Hpa majaw nga yang ya na zawn Karai Kasang a tawn da lai wa ai ga shaka gaw Yuda masha shagu a matu ahkyak ai hte hkye hkrang la ai lam a matu grai myit mada shara rai nga ai a majaw rai nga ai. Ndai hte seng jachyum mungga Npawt 3:15 ndai ga sadi gaw Karai Kasang tawn lai wa ai hta na shawng ningnan na ga sadi jaw tsun lai wa ai lam mung rai nga ai.
Lk 1:28; Lk 1:42-45; Yawhan 2:4
Sabyi ma nna kaya hkrum maw ai hkungran poi hta Maria gaw Madu hpe sa tang shawn ai ten hta Madu Yesu gaw numsha e ngai hpe hpa seng a ta nye a ten garai n du shi ni ai. Ya na zawn Madu Yesu shi a kanu hpe numsha e ngu nna tsun dat ai lam gaw hkungran poi de sa shang lawm ai shawa masha ni chye lu na matu hte Karai Kasang shawng nnan tawn da lai wa ai ga sadi hta na numsha ngu masha gaw ndai numsha re ngu nna ading tawk madun dan dat ai lam mung rai nga ai.
Nye a kanu gaw yu maya numsha n re ga shaka hta rawng ai numsha rai nga ai majaw numsha e ngu nna shadan shadawng dan dat ai lam mung rai nga ai. Nang ngai hte hpa seng a ta ngu ai lachyum gaw ngai hte ndai numsha gaw gara hku seng a ta ngu nna shawa hpe san dat ai lam mung rai nga ai. Bai nna e ngai gaw shawng nnan na ga shaka na numsha a aru arat Messial ngu ai Hkye La Madu rai nga ai hpe sakse madun na matu hkungran poi de sa ai shawa a man hta jam dibu ni hta bang da ai hka kawn tsabyi ntsin de galai shai kau ya lai wa ai rai nga ai. Maga mi hku tsun ga nga yang Karai Kasang shawng nnan tawn da lai wa ga shaka hta hta numsha a aru arat rai nga ai Messial hkyela Madu gaw ngai rai nga nngai. Hkungran poi sa lawm ai shawa masha kawn mungkan ting hpe shi hkum shi shadan shadawng dan dat ai lam mung rai nga ai. Ndai mau hpa lamik kumla gaw shi madu a shawng nnan na lamik kumla rai nga ai hpe hpang jahtum hta tsun tawn da ai hpe mu lu ai.
Yawhan 2:12 Kalawari bum ntsa na udang nhpang hta mung Madu Yesu kawn Nu Maria hpe Nu e ngu tsun shaga na malai numsha e na a kasha hpe yu ngu nna tsun lai wa ai hpe mu lu ai. Yawhan 19:26
Tsun mayu ai lachyum gaw nang gaw Karai Kasang ga sadi tawn da lai wa ai hkyela madu a Kanu re ai zawn ngai gaw dai hkyela madu rai nga ai. Nang a shang lawm mu gun hpai ai lam a majaw ngai Karai Kasang hkyela da ai mungkan masha ni hpe matut nna yu lanu lahku nga u ngu nna Udang ntsa na numsha e ngu ai mying hpe shaga nna numsha ngu ai hte seng ai lit hpe bai kahtap nna shatsam da lai wa ai lam rai nga ai. Shingran 12:1 hta Tsawra ai nu wa hpu nau ni kanu chyoi pra ai Maria zawn madu a lagaw hkang hte maren hkawm sa na nga yang masha yawng a matu hkye hkrang la ai amu magam hta ang ai shara kaw na aput angun n nga ai sha shang lawm mu gun hpai ai rai yang hka kawn tsabyi ntsin de galai shai kau ya ai zawn dai gun hpai ai amu ni kawn shaman chyeju maga de galai shai kau ya na gaw teng sha rai nga ai.
Akyu hpyi saga Oh Hpan Madu Karai Kasang e chyeju mahakra matu chyeju dum ai hte nang Wa hpe grau nna kam sham tsawra chye chyang lu ai hte nang Wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a Madu Hkristu a marang e hpyi nem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta. Kahkawng ngu na lanban rai nga ai hti ang ai ja chyum mungga ni gaw chyum mungga daw langai Esaia laika 62 :1 – 5 chyum mungga daw lahkawng Kawrintu hpung masha ni hpang de san Paulu shagun dat ai laika langai 12:4- 11 Kabu gara shiga yawhan 2:1- 11
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.
