Pranwan Ladaw Laban ( III )
Karai Kasang A Mungga

1Kor 12:27 Ya nanhte gaw Hkristu a hkum hkrang rai nga ai hte langai hte langai de a daw shan ni rai nga myit dai.

Hkristu hta tsawra hkungga ai nu wa hpu nau ni ndai laban gaw shaning C a Pranwan Ladaw ( III ) rai nga ai.
Tsawra ai nu wa hpu nau ni Kasa Pawlu gaw kanu nawku hpung ngu na madu a hkumhkrang rai nga ai mungsung lam hpe kam sham ai kashu kasha ni hpe asan sha chye na hkawn hkrang hkap la kam sham lu na matu shi a prat hte rang nna Karai Kasang shadan dan ai shingran ni hpe shadum jahprang laika ni hte laika ka ai shaloi asan sha tsun tawn da nga ai..Kasa laika 9:1-9 hpe hti dat ai shaloi kasa Pawlu a lam hpe mu lu ai dai gaw gumra jawn nna damascus de rawt sa wa ai lam hta byin lai wa ai lam rai nga ai.

Ndai mabyin lam hta hpa rai ngai hpe zingri zingrat nga a ta ngu nna tsun ai lam hpe atsawm sha sawn sumru yu yang ngai gaw nang hkan zingri sat taw ai Yesu rai nngai ngu nna Madu Yesu tsun lai wa ai hpe asan sha mu lu ai..hpa majaw nye a nawku hpung nye a hpang hkan nang nga ai ni hpe hkan zingri nga a ta ngu nna e n tsun ai sha ngai hpe ngu nna jai lang lai wa a ta hpa jaw nga yang..Madu Yesu hte kanu nawku hpung gaw hkum hkrang langai sha rai nga ai. Madu Yesu gaw nawku hpung a baw rai nga ai zawn nawku hpung gaw Madu Yesu a mu lu ai hkumhkrang ngu na mungsung lam rai nga ai mu lu ai hte n mu lu ai madu a hkum hkrang a lam hpe chye na hkawn hkrang wa ai ten hta hkristan ni hpe hkan sat taw nga ai sawlu ngu ai prat kawn shi hkum nan Madu Yesu a hpang hkan nang ai masha tai wa nna kasa Pawlu ngu ai mying nnan hte hkristan sasana majan je ai masha tai wa ai.rai nga ai. Kasa Pawlu gaw tengman ai lam hpe chye wa ai hte laning mi na ai hpang galati masha ni hpang de ka ai shadum jahprang laika hpe yu dat yang gal 3:28 nanhte yawng mayawng gaw hkristu hta e langai sha rai nga myit dai majaw yuda wa ngu na mi n nga heleni wa ngu na mi n nga mayam ngu na mung n nga shanglawt ngu na mung n nga lasha numsha ngu na mi mung n nga lu ai ngu nna tsun da ai hpe mu lu ai.

Madu Yesu tsun mat ai ga hpe Yawhan 15:5 hta mu lu ai, Madu Hkristu langai hta sha kahkyin gumdin pawng hpawm ai lam gaw tsawra myit nga ai zawn madat mara nga ai lam san san sha mung n rai nga ai. kaja wa nan hkristu hta hkristan ni.. hkristan ni hta hkristu langai hku nna kahkyin gumdin sak hkrung nga ai lam rai nga ai..tsun mayu ai gaw hkumhkrang langai zawn kahkyin gumdin nga ai lam rai nga ai. Hkristan ni gaw hkristu a asak hte asak hkrung nga ai lam mung rai nga ai..nawku hpung gaw Madu Yesu a hkum hkrang rai nga ai. Hkristan ni gaw hpung masha ni rai nga ai a majaw Hkristu a hkum na dawshan ni rai nga ai lam hpe 1Kor 12:27 , kanu nawku hpung hpe Madu Yesu a hkum hkrang ngu nna tsun lu na matu Madu Yesu hkum nan gaw de da ai hte shaman chyeju ni hpe lu la shangun ai lam ni hpe arawng mala nga nna sha gaw n ngut nga ai. Hkristu hta kaja wa nan sak hkrung nga na matu ra nga ai ndai lam gaw akri namta rai nga ai dai majaw nawku hpung kata e rawng nga ai hkristan ni gaw Hkristu Madu a hkum hkrang kata e lwi taw ai sai lam ni rai nga ai..dai sai lam ni rai nga ai anhte yawng gaw hkristu Madu a asak ngu ai hta shang lawm sak hkrung nga na gaw madung rai nga ai.Eph 1:22-23

Nawku hpung a baw gaw Madu Yesu shi a hkum hkrang gaw nawku hpung rai nga ai. Dai majaw n lu garan kau ai hkum hkrang rai nga ai hte asak langai sha nga ai. Dai langai ngu na asak gaw Madu Yesu a asak sha rai nga ai. Madu Yesu a hkum hkrang ngu ai nawku hpung hta shang lawm nga ai dawshan ni rai nga ai anhte ni gaw Madu Yesu hta asak hkrung nga na ra nga ai. gal 2:20, Adam a aru arat kaw na shangai chying hkai wa ai..anhte shinggyim masha ni gaw Madu Yesu a hkum hkrang kata de shang lawm lu na matu Madu Yesu hta nnan bai shangai na ra nga ai. Roma 6:3 dai hta kaga Hkristu Yesu hta e Kashin kamun hkam ai ni anhte nlang hte gaw shi a si hkam ai hta Baptisma hkam nga ga ai hpe nanhte n chye nga myit ni? Gal 3:27 Hkristu hta Kashin kamun hkam ai ni yawng hte gaw Hkristu hpe bu hpun sumraw nga myit dai.

Karai langai hta marai masum nga ai dai hta na lahkawng ngu kasha Karai Kasang Yesu hte langai sha kahkyin gumdin pawng hpawm ai a marang e marai masum atai langai Karai Kasang hta anhte yawng gaw shang lawm asak hkrung wa lu ai rai nga ai. Yawhan 17:21 nang ngai hpe shangun dat ndai gaw mungkan ga na ni kamsham lu mu ga daini nlang hte gaw langai sha tai nna Wa e nang ngai hta nga nga nna ngai mung nang hta nga nga na matu ngai hpyi nngai. Yawhan 14:20 ngai gaw nye Wa hta nga nga nngai mung nanhte ngai hta nga nga myit dai mung ngai namhte hta nga nga nngai mung dai shani e nanhte chye lu na marin dai..ngu nna tsun da ai hpe mu lu ai.

Anhte hkristan hpung masha ni yawng Madu Yesu hte langai zawn sha kahkyin gum din nga ai lam gaw kanu hte ma chyangai zawn rai nga ai htan grau nna shingra tara htan lai ai pawng hpawm lam rai nga ai. Hpa majaw nga yang kanu hte kasha gaw asak lahkawng naw rai nga ai. Madu Yesu hte anhte hkristan hpung masha ni a pawm hpawm ai lam gaw law nga ai zawn rai tim asak gaw hkristu a asak hta shang lawm nga ai majaw karai asak ngu ai hta langai sha kahkyin gumdin sak hkrung nga ai lam rai nga ai.

Karai Kasang hpan tawn da ai shingra tara hta e sari sadang hte asak hkrung lu na matu shada da pawng hpawm ra nga ga ai. tsaw dik ai wa hte pawng hpawm ai a marang e grit nem dik ni gaw tsaw wa ai ga kata na ga sau ni gaw hpun ni a chyup sha ai hkrum ai ten ga sau gaw madang tsaw ai hpun hta e pawng hpawm shang lawm wa lu ai zawn rai nga ai. San Augustine tsun ai hta nu maria gaw shi a hkritung kata e na um na sin ai a majaw shi hpe shakawn hkrum ai htan Madu Yesu a asak hta Nu Maria hkum nan gaw shang lawm asak hkrung lu ai a majaw grau nna shakawn shagrau ging ai masha tai wa ai. Daini e kasi la hpa lam masum hpe tsun dan mayu ai. anhte yawng gaw shada da kam hpa manoi manat nga hkat na matu ra kadawn nga ai ni chyu rai nga ai. Kanu nawku hpung kata hta mi rai rai dinghta mungkan hta mi rai rai akyu nrawng ai masha ngu ai gaw n nga ai yawng gaw shi manu hte shi nga nga ai hpe chye da na ahkyak nga ai ngai hte nseng ai nga nna nra nra rai nga ai koi yen kau ai. Ngai n nga yang nanhte chye hkra nga nna hpaji madun hkat ai bai tinang hkum nan gaw hpa mung n galaw nna masha wa a galaw nga ai hpe yu nna mara shagun shatan nga ai lam hpe kaja wa nan koi gam na ra nga ai sasana gawde ai lam hta gaw anhte hkum ngau shagu shanglawm gun hpai na ra nga ai.

Nawku hpung jut shagu hta n-gun ja angang kang galu kaba wa na matu nawku hpung kata hta rawng nga ai kashu kasha shagu gaw shara ra hta bungli galaw shang lawm gunhpai na grai nan ra nga ai. Lahakwng hta gaw anhte shada da hkungga lara hkat ai lam nga ra ai..hpaji chye ai n chye ai, lusu ai matsan ai kaba kaji mahkra gaw shada da tsawra hkungga lara hkat nga na gaw ahkyak nga ai lu ai su ai chye dum ai ngu ai myit masa ni hpe la kau nna atsam marai nga ai made tinang ang ai magam bungli hta shanglawm gun hpai chye na sha madung rai nga ai..shada manu shadan hkat nga na ahkyak nga ai.

Masum hta gaw shada myit tau chye hkat ai lam rai nga ai hkum hkrang a shara ra hta e hkra machyi sai nga yang hkum ting machyi ai zawn anhte a lapran ni hta mung langai ngai ningra mat yang ngu nna yawng myit tau chye ya hkat nna hkawm sa na ahkyak nga ai. Myit tau chye ai lam n nga sa i nga yang manang wa hpe mara shagun shatan hkat rai nna sha nga ai masha rai nga na re tsawra ai nu wa hpu ni e anhte mung shada da pawn ba n gun jaw chye ai hkungga lara hkat rai let myit tau chye ai kashu kasha ni tai nga lu myit akyu ya dat lu nngai.

Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta masum ngu na lanban rai nga ai hti ang ai ja chyum mungga ni gaw

Chyum Mungga Daw ( I ) Nehemia a laika 8: 2-6, 8-10
Chyum Mungga Daw ( II ) 1Kor 12: 12-30
Kabu Gara Shiga – Lk 4: 14-16

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.