Dai ni na Ja Chyum Mungga hpe anhte hti sumru yu ai shaloi e, Nli gat ai wa a ga shadawn hpe anhte ni na lu ga ai. Dai nli gat dat ai shaloi e, nli tum gaw n kau mi lai lam ntsa e hkrat ai majaw U numji ni hta sha kau ma ai. Bai n kau mi, lung rawk ga hta hkrat ai. Ga sau n kaja ai majaw, tu prut wa tim kyip si mat ai. N kau mi Ju sumwum kaw hkrat ai majaw, ju hpun ni ka-up kau nna asi n lu si ai. Bai n kau mi gaw ga sau kaja ai kaw hkrat nna, tu kaba wa ai majaw, dang sumshi, dang kru shi asi law law shu la lu ai.
Shiga madat nu wa ni ndai ja chyum mungga gaw asan sha anhte hpe tsun shadum ya nga sai. Nang ngai Karai Kasang a kasha ni tai let makam masham lu ai shi Madu a kasha ni rai nga ga ai raitim, kalang lang sagu hpyi hpun ai jahkyawn hte bung chye ga ai. Karai Mungga hpe shani shagu na la madat la nga ga ai raitim, anhte a myit masin salum gaw, Ja la ai lung rawk ni, Ju sumwum kaba ni Ga namhpun n rawng ai ga jahkraw ni hte bung taw ai rai yang, Karai a Mungga ru jung na n mai byin nga ai. Mungga ru n jung ai rai yang, shi Madu hte bung wa lu na n mai byin nga ai. Kaja ai Hkristan masha tai na mung n mai byin nga ga ai. Dai hpe dum nga let jaw kaja ai hku shakut sa nga ga law.
