Dai ning gaw 2025 ning, Chyoi pra ai Jubilee Shaning rai nga ai, ndai Jubali shaning hta INDULGENCE ngu ai, raw kau ya sai mara ni a matu naw hkam la ra ai ari dan kaw nna shalawt dat ya ai shaman chyeju hpe hkam la lu mai ai lam, nawku hpung a ningbaw Wa Sarabyin Francis kaw nna ndau shana da nga ai.

Ndai Jubali shaning laman, INDULGENCE ngu ai, raw kau ya sai mara ni a matu naw hkam la ra ai ari dan kaw nna shalawt dat ya ai shaman chyeju hpe hkam la lu na matu hkan galaw sa ra ai lam ni hpe mung Wa sarabyin kaw nna matsun jahkrat da ya nga ai.

Dai ni gaw –

1. Masat da ai shara ni de akyu hpyi bu hkawm sa lam galaw ai.

2. San seng ai shara/Nawku Jawng ni de sa du kawan akyu hpyi lam galaw ai.

3. Tsawra matsan dum lama ai magam bungli ni hta shang lawm gun hpai lam galaw ai, ndai hpan masum rai nga ai.

Akyu hpyi bu hkawm sa na matu mungkan madang hku nna nawku hpung ginjaw Vatican kaw nna masat da ya ai shara ni gaw, Italy mungdan, Roma kaw nga ai San Petru Nawku Htingnu kaba hte Chyoipra ai Buga (Holy Land) ni rai nga ai.

Myanmar Mungdan madang hku nna, masat da ya ai shara ni gaw, Yangon St. Mary Nawku htingnu kaba, Taunggyi St. Joseph Cathedral, Nyaung Lay Byin Maria Lungpu hte Mandalay Saradaw ginwang na Chanhta Kone kyu hpyi ginra ni rai nga ai. Bai anhte Myitkyina sasana a matu Wa Saradaw kaw nna masat da ya ai nawku jawng ni gaw, Myitkyina grup yin jau ginwang ni hkan shanu nga ai hpung masha ni a matu gaw, San Columban Cathedral, bai tsan ai shara hkan shanu nga ai hpung masha ni, Myitkyina de sa du na matu yak hkak ai hpung masha ni a matu gaw, tinang a jau ginwang, ginwang up jau dung ai nawku jawng ni yawng nga nna masat da ya nga ai.

Lai wa sai January 10 ya shani hta St. Columban’s Cathedral Jubilee Chyinghka hpaw let anhte Myitkyina Saradaw Ginwang a matu 2025 Jubilee shaning hpe hpang wa saga ai. Jau ginwang shagu hta mung Jubali chying hka hpaw ai lamang ni galaw nna, Chyoi pra ai Jubali shaning de shang wa let, hpung masha ni yawng Jubali shaman chyeju ni hkam la lu hkra lajang ya ai lam ni galaw na matu Wa Saradaw John Mung Ngawn La Sam kaw nna ginwang up jau ni yawng hpe mung matsun da nga ai.

Ndai Jubali shaning laman, san tawn da ai nawku jawng ni de sa du kawan akyu hpyi ai lam ni galaw let Jubali Indulgence shaman chyeju hpe hkam la lu hkra shakut ga nga nna mug Sagu rem wa, Wa Saradaw John Mung Ngawn La Sam kaw nna hpung masha ni yawng hpe n gun jaw matsun da nga ai. Dai zawn Jubali a matu san tawn da ai nawku jawng (sh) akyu hpyi ginra ni de sa du kawan akyu hpyi ai lam ni galaw ai shaloi, hkumzup ai Indulgence shaman chyeju hpe hkam la lu na matu hkan galaw ra ai lam ni hpe mung nawku hpung kaw nna matsun jahkrat da ya nga ai.

Dai ni gaw:

• Jubali shaning a matu, masat da ai nawku jawng ni a Jubali chying hka hku lai shang lam galaw ai,

• Jubili Chying hka hku garai nlai shang wa shi yang, Madu a kyu hpyi ga, Ave Maria, Shakawn Kungdawn kyu hpyi ga ni tsun let Wa Sarabyin hte shi a yaw shada ai lam a matu akyu hpyi ya ai, Jubali akyu hpyi ga hpe tsun ai;

• Mara raw sacramentu hpe hkam la ai;

• Missa nawng ya ai lam nga yang Missa hkungga lawm ai hte Chyoi pra ai hkum hpe hkam la ai,

• Missa hkungga nnga ai rai yang, makam masham akyu hpyi ga tsun ai, Chyoi pra ai hkum sacramentu a man, chyoi pra ai hkum hpe nawku akyu hpyi ai, Rosary hti ai lam ni galaw ra ai.

Garum ningtum tsawra matsan dum lama ai magam bungli ni hta shang lawm galaw ai hku nna mung Jubilee Indulgence hpe hkam la lu mai ai lam Wa Sarabyin kaw nna matsun da nga ai.

Dai ni gaw;

• tinang hpe n-ju n-dawng nga ai ni, hpyen tai ai ni hpe chye na mara dat ya ai;

• yak hkak jamjau nga ai htingbu htingbyen manaw manang ni hpe garum shingtau pawnba la ai;

• machyi makaw hkrum ai ni hpe sa du kawan lam galaw ai.

Dai re majaw, ndai Jubilee shaning laman hta garum ningtum lam ni hta dangdi dangdep ai daram shang lawm shakut nga ga. Nawku Hpung masha ni yawng Jubilee a shaman chyeju hpe hkamla lu mu ga law!