Daini na Ja Chyum Mungga hpe anhte hti sumru yu ai shaloi e, Pyending a Ga shadawn hte seng nna, anhte ni kalang mi bai na lu na ga ai. N`htoi a lam, wan shadaw (sh) Myi hprap wan a akyu rawng ai lam, wan, n’htoi a manu dan ai lam hpe yawng gaw hkam sha chye na ai ni hkrai sha rai nga na re. Anhte a wenyi lam maga hku nna sumru yu mai ai lam hta, ndai Pyending a n’htoi hpe gaw gara hku mung n mai makoi magap da lu nga ai. Dai zawn sha, n’htoi gaw anhte a matu, Karai Kasang a mungga hte bung nga ai. Karai a mungga hpe na la lu ai ni a n’htoi hpe makoi magap da ai rai yang pyending hpe shatu nna Mung kata, shing nrai yup ku npu e shadun makoi da ai hte bung nga ai.
N’htoi hpe gaw akyu rawng ai hku yawng mu mada ai shara kaw tawn da yang sha, yawng hpe akyu jaw lu ai rai nga ai. Dai hte maren sha shiga madat nu wa ni e, anhte chye da nna hkan sa ai Karai Kasang a tara lam ni hpe kaga manang wa hpe tsun gam garan ya chye na grai nan ra ahkyak nga ga ai. Dai zawn madu chye da ai Karai Kasang a lam ni hpe e, kaga masha wa hpe akaw alaw di tsun gam garan hti ya ai rai yang, Karai Kasang gaw, tinang mi shawng e chye da ai hta pyi, grau nna naw chye chyang la lu ai chyeju shi jaw ya na teng sha re.