Wa Sarabyin Francis kawn lai wa sai Laban shani na Missa hkungga hta Karai Kasang a Ja chyum mungga the rau Jubali shaning gaw anhte Chritsan ni a matu hkye hkrang la ai lam ra kadawn ai hpe hkap la nna, Madu Yesu hte rau hkrum zup ai lam hpe kalang bai nnan zawn galaw na matu ahkaw ahkang jaw ya nga ai lam hpe tsun lai wa ai.
Wa Sarabyin Francis kawn Missa hkungga garai n hpang shi yang dai shani hti ang ai Luke a kabu gara shiga na Madu Yesu gaw Nazareth na Tara hkaw jawng hta sa du shang lawm nna hkaw tsun lai wa ai.
Yesu gaw shi hkum nan Esaia a myihtoi ga hpring tsup wa sai lam hpe tsun dan ai aten hpe madi lai wa ai, dai zawn tsun shana da ai lam gaw Shi a ga madat nga ai ni hpe mau shangun ai hte sawn dinglik shangun lai wa ai mung rai nga ai.
Wa Sarabyin kawn ndai aten gaw Yesu a mare masha ni hpe dawdan lu ai ga san langai mi hpe jaw ya ai lam tsun sang lang dan ai hta, “Shi gaw Shi hte n seng ai lit hpe shi hkum shi gumrawng ai hte lak sama wa a kasha sha rai kun, shing nrai, Shi gaw teng sha Karai Kasang kaw na amyu sha ni hpe hkye mawoi la na matu shangun dat ai Meshia rai kun ? yubak hte n hkru n kaja ai yawng mayawng kaw na shalawt lu na kun?” ngu nna tsun lai wa ai.
Wa Sarabyin kawn kahtap nna Nazareth hta nga ai masha ni a hkrit kajawng ai hte myit ung ang nga ai lam hpe anhte ni myit yu ga ngu tsun lai wa ai. “shanhte gaw shi hpe grai chye sai ngu shadu da lai wa ai gaw shanhte a myit masin hte salum hpe amai sha hpaw ya na matu, nhtoi hpe ka-up da ai shingnip zawn, dai hku n galaw lu hkra pat shingdang kau ya ai.” hpe tsun lai wa ai.”
Wa Sarabyin kawn ya daini na aten hta raitim ndai Kabu Gara ai chyum daw gaw anhte kamsham ai ni hpe Madu Yesu a lam tinang hkum gade daram chyena da sai hpe san jep na matu saw shaga nga ai hpe tsun lai wa ai.
“Anhte gaw Shi hte rau kaba wa ai, jawng hta, nawku hpung hta, Tara laika sharin jawng ni, Catholic htung lai nga ai mungdan hta shi gaw anhte a matu galoi mung grai nihtep nga ai masha rai nga ai nga nna mung tsun lai wa ai.
Wa Sarabyin kawn Madu Yesu gaw Karai Kasang a Kasha hte anhte a hkyela Madu rai nga ai hpe teng sha hkap la sai re hpe tinang hkum tinang san jep yu na matu n gun jaw tsun shadum lai wa ai.
“Nazareth na Kasha Yesu tsun ai laklai ai ahhkaw ahkang hpe anhte ni lu hkam sha nga ai kun?” bai nna “shi madu gaw gadai mung anhte hpe nlu jaw ai hkyehkrang la ai lam hpe jaw ya lu ai wa rai nga ai hpe anhte ni gaja wa masat da nga sai kun? ngu ai hpe san lai wa ai.
Dai majaw Wa Sarabyin gaw hkyehkrang la ai lam hte seng nna anhte ni hta ra kadawn nga ai lam hpe hpe myit sawn yu na matu saw shaga nga ai hte dai ning gaw anhte a matu chyeju hkam la ai shaning re ngu ai hpe anhte ni chye yang she anhte ni chyeju hkamla lu na re hpe tsun san lang dan lai wa ai.
