Nhtoi: 29-1-2025
Myit Mada Lam Hpe Simsa Lam Hku Galai Shai Wa Lu Hkra Shakut Shaja Nga Ga! Nga Nna Wa Sarabyin Tsun Lai Wa
Wa Sarabyin Francis Kawn Kru Lang na International Conference, “For World Balance” galaw ai zuphpawng hta anhte ni myit mada nga ai hpe atsam dat nna, tatut galaw sa wa yang anhte a Mungkan gaw simsa ai maga de galai shai wa na re nga nna, zuphpawng de sa du ai ni hpang de, shi a laika hte rau saw shaga shana dat ai lam hpe chye lu ai.
Wa Sarabyin Francis kawn “Hope” myit mada lam, gaw ndai kru lang na (sixth) International Conference a matu grai akyu rawng nna, manu dan ai lam langai (a very appropriate value) re ai hpe tsun lai wa ai. Hpa majaw ta teng sha tsun ga nga yang ndai zawn lamang galaw ai a marang e dai ni na num sha, la sha (today’s men and women) ni a masin salum hpe hpaw ya lu ai hte n-gun jaw ai lam ni law law shanhte a atsam ni hpe myit shadut shangun ya ai a majaw galaw sa nga ai lam re ai hpe mung tsun lai wa ai.
Wa Sarabyin Francis kawn Cuba Mungdan, Havana kaw nhtoi 28-31 ya shani du hkra zup hpawng galaw nga ai ni hpang de “Jubali Shaning a Yaw shada lam rai nga ai Tsawra ai myit, Kam sham ai myit hte Myit mada ai lam hpe madung da nna anhte marai hkum ngau shagu hta shing nrai wuhpung wuhpawng ni hta byin nga ai mayak mahkak lam (struggles) ni hpe shada da garan gachyan na matu jin jin rai ra na hpe laika hte tsun lai wa ai.
Shi a myit mada ai lam gaw ndai zawn re ai ngang kang ai daw dan ai lam (conviction) ni gaw anhte hpe myit mada gwi ai myit hpe jaw nna galaw sa na matu shadut ya ai majaw “majan a majaw jam jau hkrum nga ai lam ni kaw nna, tawt lai lu nna Mungkan a matu simsa lam hpe jaw ya na myit mada lam re ai hpe mung tsun lai wa ai.
Ndai zawn re ai (conviction) gaw anhte hta na dip lu dip sha roi rip ai ladat ni hpe (the logic of violence) koi gam kau shangun nna , galoi mung simsa wa na hpe myit mada nna gwi ai myit hte galaw lajang nna ladat nnan ni hte rau hpang jahtum ten du hkra simsa lam ni hpe gaw gap na matu yaw shada let democracy hte shada da ra ai hpe tsun jahkrum nna galaw sa na matu anhte ni hpe saw shaga nga ai lam hpe tsun lai wa ai.
Wa Sarabyin kawn anhte a prat hta “anhte a shawnglam hpe myit mada let hkawm sa ai” (to look to future with hope) hta mayak law law hkrum ai ni yawng hpe karum ya na ra nga ai hpe tsun sanglang dan lai wa ai, grau nna matsan ai ni hpe shawng wuhpung wuhpawng ni hte shanhte hkum shanhte gwi ai myit (confidence) ni bai rawng wa na matu karum shingtau ai hte lam hpaw ya ai hku karum shingtau la ra ai hpe tsun lai wa ai.
Machyi makaw byin ai hte matsan nga ai ni, asak kaba ai hte ramma ni, htawt sit hkrum ai hte nga shara n lu ai ni, lu gring ai ahhkaw ahhkang sum nga ai ni hpe galoi mung anhte ni gaw madung da nna myit ya ra ai hpe shi hpyishawn nga ai, dai rai yang she anhte gadai mung myit karen gari nhkrum nna masha shada da hkungga hkat wa na re hpe tsun lai wa ai.
Wa Sarabyin Francis kawn Madu Yesu tsun shadum da ai ga, “nye a kahpu kanau ni hta na kaji dik ni hpe galaw ya ai gaw Ngai hpe galaw ya ai re ai lam hpe” anhte hkristan hpung masha ni hpe shadum tsun lai wa ai. Bai nna Karai Kasang a Kasha ni hte anhte nta masha ni a lapran hta kahpu kanau ngu shaga nga ai Num hte La marai hkum ngau shagu hpe Karai Kasang a hkrang nsam hku na mu chye na matu saw shaga nga ai.
Wa Sarabyin kawn Madu Yesu hpe nkam sham ai ni a matu rai tim, anhte ni hta tawn da ai ndai ga sadi gaw anhte hpe hpring zup ai atsam hpe jaw da ya nga ai, dai hte maren sha anhte ni yawng gaw shada da kahpu kanau zawn rau nga na matu shaga da hkrum sai re majaw masha u ga ni a matu anhte galaw ya ai lam gaw anhte ni hte wuhpung wuhpawng a matu akyu hkam la lu nga ai lam hpe tsun lai wa ai.
Wa Sarabyin Francis kawn hpang jahtum hku nna “anhte ni ndai kasi la shara hpe Tsawra myit kaw na sharin la ga” ngu tsun lai wa ai. Anthe masha shagu ra kadawn nga ai Myit mada ai lam hpe gaw gap ga, masha u ga ni hpe matsan ai hpe karan kachyan ai lam ni hpe sharin ya ga, bai nna anhte a masin salum hpe hpaw nna masha u ga (others) hpe shim lum ai hku hkap tau la ga, dai zawn re ai hpe galaw ai a majaw anhte ni hpa galaw ra ai hte masha ni a matu akyu rawng hpa magam ni hpe galaw ra na hpe chye wa lu na re hpe tsun lai wa ai.
