Dai ni na Ja Chyum Mungga hpe anhte hti sumru yu ai shaloi e, shinggyim masha a hkum hkrang hta, gawng kya ai ten ni hta e, tsadan gaw gung lau na grai loi la nga ai lam hpe, Madu Yesu tsun shadum ya ai rai nga ai. Shing rai dai ni na Marku a kabu gara shi ga hta e, n san seng ai Nat ni chyawm gaw, pru wa nhtawm WA ni hta shang ma ai. nga ai Ga si ga yan gaw, anhte yawng a matu sumru dinglik yu mai nga ai. Dusat ni mahkra hta e, Wa ni hpe gaw, n san n seng ai matsat shabat manam shagram re ai dusat hku nna mu mada hkap la ga ai re. Hpa majaw dai hku hkap la nga ga ta nga yang e,
Wa ngu ai dusat hpan gaw, dai kaw sha, dai kaw Jit maza sa da, dai kaw sha bai kaleng yup re ai majaw, shi hkum mung manam shagram n san n seng ai rai nga ai. Dai majaw dai n san seng ai Wa u nawng kaw nat tsadan shang na aloi sha rai nga ai hpe anhte hpe madi madun ya sai. Tsawra ai shiga madat ni yawng hte e, anhte a hkum hkrang myit masin hpe mung, tut nawng san seng hkam kaja tsawm htap ai hku nga sa na ahkyak la nga ai. Grau nna anhte a Wenyi kraw lawang hta tut e, san seng chyoi pra ai hku nga sa na ra ga ai. Dai zawn chyoi pra nga lu na matu shut hpyit mara ni hpe koi yen let, Karai Kasang ra sharawng ai hku nga sa ai rai yang sha, n hkru n kaja ai Nat tsadan a gunglau ai lam ni hpe tawt lai lu nna, san seng ai hku nga sa lu na rai nga ai. Dai majaw anhte ni shani shagu shi Madu hta kamhpa manoi let hkawm sa nga ga law.
