Daini na Ja Chyum Mungga hpe hti sum ru yu ai shaloi e, Herod Hkawhkam hte tengman lam a majaw, Yawhan Baptista sat kau hkrum ai lam ni hpe na lu ga ai. Anhte shinggyim masha ni hta e mung byim chye ai gaw, kaga masha wa, awng dang ai lam ni nga wa yang e, dai masha wa hpe n ju n dawng ai, manawn masham ai hte, n kaja ai hku shi hpe tsun jahpoi nna, mara tam ai lam ni byin chye nga ga ai. Shing rai ya ndai Herod hkawhkam wa mung dai zawn sha, mara n nga ai Madu Yesu hpe mara tam nga ai hpe na lu ga ai. Matut nna mung Herod hkawhkam wa gaw, n teng man ai, n jaw ai lam hta shi a ga sadi hpe hkan shatup ai lam hpe mung na la lu ga ai.
Tsawra ai shiga madat ni e, Myen ga malai nga ai “Jaw ai lam tsun yang, mare shinggan de gawt kau hkrum ai” nga ai ga nga tim, nang jaw kaja ai tara hpe hkan sa ai wa rai yang, kaja ai wa hpe kaja ai ngu, na a n-gup aga hta, gwi gwi tsun sakse hkam ya na lit kaba nang kaw nga nga ai hpe n mai malap ai. Shingrai anhte a prat hta e mung, teng man jaw ai tara lam ni hta gwi gwi tsun shaga tsap lu hkra shakut sa nga ga law.
