5th Sunday (Ordinary Time Year-C)
“Vocation Is God’s Free Gift”
Hkristu hta tsawra ai nu/wa hpu nau ni e, ndai laban gaw shaning C a Pranwan Ladaw Laban ( V ) rai nga ai.
1st Reading Isaiah 6: 1-8 “Call of Prophet Isaiah”
Na la lu na chyum mungga daw langai, Isaiah 6: 1-11 hta, Myihtoi Isaiah a shaga la ai lam hpe anhte mu lu ai. Myihtoi Isaiah hkaw tsun ai lam ni gaw Madu Karai Kasang shaga majaw myihtoi amu hpe shi gun hpai ai hpe sakse hkam ai lam rai nga ai. Shi gaw shingyim masha rai majaw n kup tsup ai lam ni, gawng kya ai lam ni law law nga ai majaw Madu Karai Kasang a mungga hkaw tsun sakse kam na matu n ging dan ai ngu nna hkam la ai. Rai timung, Madu Karai Kasang gaw shi hta nga ai n kup tsup ai lam ni, gawng kya ai lam ni hpe kashin kau ya sai. Dai lam hpe Isaiah laika 6: 6-7 hta “Shaloi Serahpim langai mi gaw tawn hkungri ntsa na, lakap the matep la ai wan n-ga, shi a latah ta lang le, ngai hpang de pyen sa nhtawm, dai the nye a n-gup ahtawk let, yu u, dai gaw na a nten hpe hkra sai; na a mara hpe yeng seng kau sai; na a yubak hpe mung raw dat kau nu ai, nga ai” ngu nna mu lu ga ai.
2nd Reading 1 Cor 15: 1-11 “Call of St. Paul”
Chyum mungga daw lahkawng Korinhtu hpung masha ni hpe shangun dat ai laika 15: 1-11 hta “San Paulu gaw ‘kasa ni hta kaji htum ai wa ngai rai nga nngai. Madu Yesu Hkristu a kabu gara shiga hpe hkaw tsun sakse kam na matu shi hpe shaga la ai’ ngu nna shi a shaga la ai lam hpe anhte na la lu na rai nga ai.
3rd Reading Lk 5:1-11 “Call of First Disciples”
Luka a kabu gara shiga hta “Madu Yesu Hkristu gaw shawng nan na sape ni hpe shaga ai lam” tsun da ai hpe mu lu ai. Madu Yesu hkaw tsun ai mungga ni hpe madat la lu ai, shi galaw dan ai lamik kumla ni hpe mu ai shaloi Simon Petru gaw “Madu e, ngai kaw na wa mat u; ngai gaw yubak kap ai masha rai nga nngai” ngu nna shi hkum nan Madu Yesu hte n ging dan ai lam hkap yin la nga ai hpe mu lu ga ai. Raitimung, Madu Yesu gaw Simun Petru hpe “hkum hkrit et; ya kaw nna nang masha hpe hkan hkwi na rin dai” ngu nna mahtang bai tsun dat ai. Madu Yesu a shaga la hpe na ai hte rau Simon hte shi a manaw manang ni gaw shanhte a arai mahkra hpe kau da nna, Madu Yesu kaw hkan nang mat ai.
Dai ni anhte ni yawng Madu Karai Kasang a mungga hpe hkam la let tinang a wenyi lam hpe shajin na matu gabaw (II) hte tsun dan mayu ai. Dai gabaw (II) hpe madat la nna tinang hkum nan tinang myit sawn sumru let hkawm sa wa nga ga.
(I) Shaga la lam yawng gaw Karai Kasang a kum hpa rai nga ai.
Myihtoi Isaiah a shaga la ai lam hpe muhti ai shaloi, Myihtoi Isaiah gaw “shi n san n seng ai n-gup tu ninglen, n san n seng ai n-gup tu ai amyu kaang e nga ti mung, Zaw nawng zaw wa up ai Karai Kasang ngu ai, Hkawhkam wa hpe, nye myi hte nan mu lu se hka” ngu nna shi a n ging dan ai hte Karai Kasang a mu bungli gun hpai na lam hpe Is 6: 5 hta mu lu ga ai. San Paulu mung 1 Cor 15: 9 hta “kasa ni hta kaji htum ai wa ngai rai nga nngai; Karai Kasang a Hpung hpe zingri zingrat nngai majaw, kasa ngu na pyi ngai n ging n dan nngai” ngu nna Karai Kasang a shaga la ai lam hpe n ging n dan ai ngu ai hkam la ai rai nga ai. Madu Yesu Hkristu shawng nnan shaga la ai sape ni hta na Simon Petru mung “Madu e, ngai mara kap ai wa rai nga ai” ngu nna tsun let n-ging dan ai lam hpe tsun lai wa ai rai nga ai. Anhte yawng mung Jau, Ma Ma, kun dinghku prat hpe hkawn sa saloi ging dan ai majaw n rai nga ai. Anhte hkawm sa lu ai gaw Karai Kasang jaw ai shaman chyeju a majaw rai nga ai. Dai majaw anhte hkam la ai shaga la ai lam ni yawng gaw Karai Kasang jaw ya ai kum hpa rai nga ai. Dai kum hpa hpe manu shadan let hkawm sa ra ai hpe ndai bat na mungga hku anhte hpe shadum ya nga ai.
(II) Karai Kasang gaw anhte hpe laksan magam bungli a matu shaga nga ai.
Na la lu na chyum mungga ni hpe yu ai shaloi Myihtoi Isaiah a shaga la ai lam, San Paulu a shaga la ai lam, hte Madu Yesu Hkristu a shawng nnan na sape ni hpe shaga la ai lam rai nga ai. Shanhte a shaga la ai lam gaw n-bung nga ai. Myihtoi Isaiah hpe Karai Kasang shaga la ai shaloi shi hpe Israel amyu sha ni hpe “tengman ai tara sharin shaga na matu, myit malai lu let Karai Kasang hpang de bai gayin wa na matu” shaga la ai lam rai nga ai. San Paulu hpe Madu Karai Kasang shaga la shaloi shi hpe maigan amyu sha ni hpe laksan nhtoi jaw na matu hte sasana magam bungli galaw na matu rai nga ai. Madu Yesu gaw shawng nnan na sape ni hpe shaga la ai shaloi mung shanhte hpe shi hkaw tsun ai lam ni hpe sakse hkam na matu hte shi gawde da ai nawku hpung hpe makawp maga na matu rai nga ai.
Ndai bat na mungga hku nna anhte a shaga la lam hpe bai myit yu na matu saw shaga taw nga ai. Anhte hkum nan shaga la lam hta Karai Kasang laksan yaw shada da ai lam ni nga ai hpe bai myit dum let tinang a shaga la ai lam hpe manu shadan na matu ndai bat na mungga hku nna sharin ya nga ai.
Hpang jahtum hku nna tsun mayu ai, anhte ni yawng gaw n-ging n-dan ai rai timung Madu Karai Kasang hpe kam sham kam hpa ra ai. Anhte hkawm sa, tsun shaga ai lam ni yawng gaw masha ni a matu, anhte hte ni nawn nga ai kun dinghku masha ni matu kasi kaja tai lu hka shagut hkawm sa ra ai. Chyum mungga daw langai Isaiah laika hta Madu Karai Kasang gaw “Ngai kadai hpe shagun dat na i? Anhte a matu kadai wa sa na i?” ngu nna Myihtoi Isaiah hpe san ai zawn anhte hpe san taw nga ai. Myihtoi Isaiah gaw Karai Kasang a nsen hpe na ai shaloi “Ngai nga nga nngai” ngu nna Karai Kasang a shiga hkaw tsun na matu hkap la lai wa ai rai nga ai. Dai majaw anhte yawng mung Myihtoi Isaiah zawn Karai Kasang a kabu gara shiga hkaw tsun sakse hkam na matu hkap la ra ai. Tinang a shaga la ai lam hpe kangka sadi dung ai hte asak hkrung hkawm sa ai lam mung Karai Kasang a mungga hpe sakse hkam ai lam rai nga ai. Dai majaw tinang a shaga la ai lam hpe manu shadan let asak hkrung hkawm sa wa nga ga.
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta. manga. ngu na lanban rai nga ai hti ang ai ja chyum mungga ni gaw
Chyum Mungga ( I ) -Esaia a laika 6: 1-8
Chyum Mungga ( II ) 1cor 15: 1-11
Kabu Gara shiga -Lk 5: 1-11.
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law
