Daini na Ja Chyum Mungga hpe hti sum ru yu ai shaloi e, Genesaret Nawng Makau e Yesu shamai shatsai ya ai lam na chye lu ga ai. Moi Madu Yesu shi sak hkrung hkawm sa ai ten hta, Hkristan hpung masha jiwoi jiwa ni a kam sham myit kade kaba nga ai ngu ai gaw mau hpa nan rai nga ai. Dai ten hta shanhte ni Madu Yesu gara shara kaw du yang shanhte mung lu du hkra hkan sa let shi a mungga madat hkam la ai. Bai machyi ai masha ni hpe mung, kade tsan ai shara de raitim du hkra woi lakawn sa lu ai lam ni gaw, shanhte a ngang kang ai mau hpa kam sham myit a majaw sha rai nga ai re. Dai zawn re ai kamsham myit hpe kasi yu la nga ga.
Shingrai anhte a makau grup yin ni hta e, wenyi lam yan hta gawng kya nga ai ni hpe woi lakawn sa ga. Bai mara kaba kap let sak hkrung nga ai hkristan hpung masha hpu nau ni, chyeju kumla sacramento hkam la ra ai ni hpe mung, Jau tarahkaw sara ni hte hkrum shaga lu hkra, anhte nan lam woi sa na lit nga ai hpe ja ja dum let dai lit magam ni hpe gun hpai sa lu hkra shakut sa ga law.
