6th Ordinary Sunday Year-C (Homily)
Introduction
Hkristu hta tsawra ai nu/wa hpu nau ni e, ndai laban gaw pran wan ladaw hta laban (6) rai nga ai. Anhte ni hpe myit masin wenyi ningun jaw na matu hte anhte hpe mai kaja ai de lam woi na matu Karai Kasang gaw shi a mungga hku nna anhte hpe galoi mung jaw ya nga ai. ndai laban hta mung Myihtoi Jeremiah laika 17: 5-8; San Paul Corinthians hpung masha ni hpang de shangun dat ai laika 15: 12, 16-20 hte Luka a laika 6: 17, 20-26 ni hpe na la na lu na rai nga ai. Ndai bat na Karai Kasang a mungga ni hpe yu ai shaloi “Alu ai lam hte dagam dala ai (dingnye lu ai) lam ni” hpe anhte ni mu lu ga ai. “Alu” ai masha, chyeju hpring ai masha ni hku nna anhte hpe asak hkrung hkawn sa shangun mayu ai hpe asan(clearly) sha mu lu ga ai. Shawng nnan Karai Kasang a mungga hte lakap nna maumwi gadun langai mi hpe tsun dan mayu ai.
Story:
Moi shawng de kahtawng mare langai mi hta masha langai mi nga ai. Shi hpe shangai ai shaloi shi a kanu sai htaw law ai majaw si mat ai da. Kanu n nga mat ai pi nau nna shi yang shi a kawa mung nam maling de hpun hta sa ai shaloi jau gawng langai mi shan shadu nna sanat hte gap kau hkum ai a majaw si mat wa ai. Dai zawn mabyin lam ni hpe mu ya ai kahtawng masha ni gaw shi hpe “dingnye lu ai masha, kahtawng masha ni hpe tsin-yam kaba jaw na masha” ngu nna hkap la wa ai rai nga ai. Dai majaw mare masha ni gaw bawngban nna, shi hpe hpuggyi jawng de sa kau na matu myit hkrum daw dan ma ai. dai zawn Shi hpe hpunggyi jawng de wa sa ai shaloi mung marang kaba htu ai hte mu mung grai ngoi lai wa rai nga ai. Dai ma gaw shabrang brang wa ai du hkra hpunggyi jawng kata hta nga nna, hpunggyi ni a ga hpe madat mara ai masha langai mi tai wa ai. Raitimung, mare masha ni a ningmu gaw moi shi kaji ai aten hta shi hpe mu lai wa ai myit masa sha naw rai taw nga ai. Dai majaw nkau mare masha ni gaw shi hpe mu yang, koi ai kau kau rai ai . Nkau mi bai rai yang gaw shi hpe matsa ai. Shi kaja ai amu galaw timung kaja ai hku n mu ya ai. Raitimung, shi gaw hpunggyi kaba a ningun jaw ga hpe shi a myit hta galoi mung bang da ai. Dai ningun jaw ga gaw “Masha ni hkap la tim, n hkap la tim kaja ai amu hpe galoi mung galaw hkawm sa nga u. Nang hpe shanhte ni kaja ai hku mu na matu aten law law naw jaw ra ai. Na a kaja ai nga sat nga sa lam ni gaw lani mi na ten hta shanhte a ningmu ni hpe galai shai kau lu ai atsam nga ai” ngu ai lam rai nga ai. Aten ladaw na wa ai hte kahtawng masha ni a matu shi galaw ai kaja ai amu ni, shi a kasi kamang la mai nga ai nga sat nga sa lam ni hpe mare masha ni gau ngwi ngwi hkap la wa ai. Hpang jahtung shi gaw dai kahtawng hta ningbaw tai wa ai hte dai kahtawng hpe tsawra ai myit, hte tara rap ra ai hku up hkang nga ai. Dai majaw mare masha ni gaw shi hpe “Karai Kasang jaw ai masha” hku nna bai myit la hkap la lai wa ai. Moi na “dingnye lu ai masha, kahtawng masha ni hpe tsin-yam kaba jaw na masha” ngu ai ga ni mat mat wa ai. Dai ni anhte ni mung ndai maumwi mabyin hta lawm ai shabrang la zawn tai hkra shagut ra ai.
(I) Karai Kasang hpe kam sham ai wa gaw “Alu” masha rai nga ai.
(Blessed is the one who believes in God)
Madu Karai Kasang hpe kam sham ai ni yawng gaw ‘Alu’ ai masha ni rai nga ai. Chyum mungga daw langai Myihtoi Jeremiah laika (17:5) hta “shinggyim masha hta shamyet shanat nna, tinang n-gun shaja let, Karai Kasang hpe jagang kau ai wa gaw, dagam dala hkrum ging ai wa rai nga ai” ngu nna atsan sha tsun da ai rai nga ai. Contrary, maga mi hku na gaw Karai Kasang hpe kam hpa let asak hkrung hkawm sa ai ni gaw “Alu” ai ngu nna tsun ai lam rai nga ai. Ya aten hta mungkan hpungtang hpaji rawt jat wa ai majaw Karai Kasang hpe malap mali kau ai masha ni law wa sai rai nga ai. “Nye a prat na matu Karai Kasang n ra ai” ngu nna tsun ai masha ni mung anhte mahkau gup yin hta law law nga taw nga ai. Karai Kasang n-nga ai ngu nna hkap la let asak hkrung hkawm sa ai ni mung lani hte lani law wa ai. Karai Kasang hpe malap ai, Karai Kasang n ra ai hku asak hkrung hkawm sa ai ni hta nang ngai n lawm na matu gaw grau ahkyak ai lam rai nga ai. Ya aten du hkra anhte ni Karai Kasang hpe kam hpa let asak hkrung lu ai gaw “Alu” ai masha re ai majaw rai nga ai ngu nna ningun la let tinang hpe hpan ai, tinang hpe asak jaw ai, tinang hpe galoi mung makawp maga ai Karai Kasang hpe kam hpa let asak hkrung hkawm sa na matu ndai bat na mungga hku nna nang ngai yawng hpe saw shaga taw nga ai.
(II) Karai Kasang hpe kam hpa let asak hkrung nga ai ni hpe ningun atsam jat jaw nga ai.
(God gives the strength to the one who trusts in Him)
Karai Kasang hpe kam sham ai nang ngai yawng hpe ra ai ningun atsam ni jat jaw nga ai. Anhte chye ai Dawi hkawkam a mabyin hpe yu ga. Goliah ngu ai masha hpe awngdan ai gaw shi a atsam a majaw n rai nga ai. Karai Kasang hpe kam hpa let shi a atsam hpe jai lang ai a majaw Karai Kasang gaw Goliah hpe dang hkau lu ai atsam/ shaman shi hpe chyeju jaw ai rai nga ai. Dai ni anhte a makau grup yin hpe mada yu ai shaloi Karai Kasang hpe kam hpa na malai tinang a ningun atsam hpe kam hpa na matu she tsun taw nga ai. Ga shadawn, Mungkan laika ni, myit sharawt ga ni law malawng gaw “Tinang a atsam hpe sha kam let tinang a prat hpe gaw gap na matu ningun jaw taw nga ai”hpe mu lu ai. Tinang a atsam hte galaw lu ai lam ni law law nga ai hpe mung Wa Jau hku nna hkap la ai. raitim Tinang galaw lu ai atsam gaw Karai Kasang jaw ai shaman chyeju ni rai nga ai hpe n mai malap kau nga ai.
Dai ni anhte ni “Karai Kasang hpe kam hpa let, tinang a ningun atsam hpe jai lang wa ra ai. Dai lam ni hpe anhte a sagu rem wa Wa Saradaw John Mung Ngawn La Sam a Saradaw shatai poi hta tsun lai wa shi a ga lasum hku nna anhte hpe shadum ya nga ai. Shi a ga lasum gaw Matthew 6: 33 hta na rai nga ai. “Nanhte chyawm gaw, shi a mungdan hte shi a dinghpring ai lam hpe shawng tam nga mu; shaloi dai nlang nanhte hpe kahtap jaw na marin dai”. Karai Kasang a dinghpring ai lam ni hpe tam nna, tinang hte seng ai magam bungli ni hpe shakut shaja let Karai Kasang a mungdan hpe gaw gap sa wa na hpe myit dum ra ai. Karai Kasang hpe kam hpa ai ni hpe galoi mung Shi a shaman chyeju ni/ ningun atsam ni kahtap nna jat jaw ya nga ai. Karai Kasang gaw nang ngai yawng hpe mung shaman chyeju kahtap jaw mayu nga ai gaw nang ngai a matu kabu gara shiga nan rai nga ai.
Conclusion
Hpang jahtum hku nna, anhte Karai Kasang hpe kam sham ai ngu ai gaw n-gup ga hte sha n law nga ai. Dai majaw Kasa Yaku ai laika (James 2: 17-26) hta “makam masham hta magam bungli n lawm yang gaw, tinang dai chyasi nga ai” ngu nna shadum da ai hpe myit yu nga ga. Ndai Jubali shaning hta tsawra matsan dum lama ai magam bungli ni hta shang lawm gun hpai ai gaw Karai Kasang hpe kam sham ai lam hpe sakse hkam ai lam mung rai nga ai. Karai Kasang hpe shagrau ai “Alu” ai masha ni tai wa lu hkra shakut sa wa ga. K.K yawng hpe shaman ya u ga.
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta sanit ngu na lanban rai nga ai
Hti Ang Ai Chyum Mungga Daw Ni Gaw,
Chyum Mungga Daw ( I ) : Yeremia a laika 17: 5-8
Chyum Mungga Daw ( II ) : 1cor 15: 12,16-20
Kabu Gara Shiga : Lk 6: 17,20-26
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.
