Mahte laika 6:19-21 hpe hti sumru yu yang “Dinghta ga ntsa e nanhte a sutgan ni hpe hkum mahkawng da mu; dainghta ga na sutgan hpe manut hte nhkan e sha jahten kau lu nna lagut ni e mung tawk waw lagu la lu ai rai nga ai. Sumsing lamu kaw mahtang nanhte a sutgan ni hpe mahkawng da mu; dai shara e manut e mung, nhkan e mung, n shaza lu ai, lagut e mung tawk waw nna lagu la lu ai nrai. Kaning rai nme law, na a sutgan nga ai kaw, na a myit masin mung nga nga na ra ai” nga nna Madu Yesu gaw Karai Kasang hta anhte a myit masin mahkra hte maju jung nga lu na matu sharin ya nga ai hpe mu lu ai.
Anhte shinggyim masha ni gaw tsawra chye dik a Karai Kasang a kashu kasha ni rai nga ga ai rai nga ga re majaw Shi hpe anhte a myit masin mahkra hte bai nhtang tsawra na hpe mung shi ra sharawng nga ai. Mahte laika 6:19-21 hta e ndai mungkan sak prat htum mat wa ai hpang hpring tsup ngang grin ai sak prat de shang wa lu ai hpe mung shadum ya nga ai. Karai Kasang hta anhte a myit masin hpe maju jung da nna htani htana asak hpe la na kun? Shing n rai ndai mungkan ga a lam hpe myit marin nna hten bya ai lam de hkawm sa wa na kun? Karai Kasang a myit ra sharawng ai hpe hkan galaw let hpring zup ngang grin ai sumsing sut gan hkan tam na kun? Hten mat, htum mat chye ai mungkan ga a pyaw hpa lam, sut gan arawng sadang ni hpe sha hkan tam nga na kun? lata la lu na ahkang anhte hpe hpaw ya nga ai.
Tsawra ai nu wa ni, anhte gaw hpa lam hpe lata la na kun?
Kaja dik gaw Karai Kasang hta sha anhte a shani shagu na sak prat hpe ap ya let hkawm sa ai gaw kaja dik re ngu n’gun jaw mayu ai. Ndai zawn sak hkrung lu na matu gaw anhte a myit mang ai lam ni, hkam sha ai lam ni hte galaw sa ai lam ni gaw shi myit ra ai lam ni hpe hkan nga ai kun aten la san jep ra nga ai. Karai Kasang a myit ra ai hta hkawm taw nga ai kun, Mungkan lam hta sha aten shama nga ai kun anhte a hkum hpe asan sha dinglik yu ra nga ai. Shani shagu san dinglik yu ai sha n-ga mara raw hpyi nem ai lam hta mung shakut nga ra ai. Dai rai yang she Kawa Karai Kasang a mara raw hkyam sa jaw ai lam hpe lu la nna shi a tsawra ai myit atsam hte anhte hpe shadaw ya nga na rai nga ai. Hten mat chye ai mungkan sak prat hta sak hkrung nga ai ten grin nga ai sumsing sut gat hpe tam mahkawng nga na hpe Karai Kasang ra sharawng nga ai hpe mung myit dum nga ga.
Shi gaw hpring zup kaja dik ai Kawa rai nga ai majaw anhte n htang da ai hku nna anhte hpe shaman chyeju jaw ya nga ai. Raitim anhte dum ra na gaw anhte matu kaja ai, akyu jaw ai shaman chyeju sha Shi jaw ya na re. Anhte hpe akyu n jaw, hten za shangun ai lam ni hpe gaw anhte kade wa hpyi tim jaw na n rai nga ai. Dai re majaw anhte a prat hpe Karai Kasang hte htep lahti rai manoi nga nna shi a myit ra ai lam hta hkawm sa let sumsing sut gan mahkawng lu na matu shakut nga ga. Jahpawt yup rawt wa ai hte Chyoi Pra ai Wenyi a myi jahpaw lam woi ya na hpe hpyi nga ga. Dai rai jang Madu Yesu si hkam nna lu tawn da ai htani htana asak hkrun lam hta hkawm sa lu hkra shi woi awn ya nga na ra ai.
Tsawra ai nu wa ni Karai Kasang kaw anhte a prat hpe ap da nga ga. Shi anhte hpyi chye ai htan, anhte myit mada ai htan grau kaba ai chyeju lajang da ya na ra ai. Shi a hpung shingkang gaw anhte hpe kaup tawn da nna anhte a prat gaw simsa kabu pyaw ai hte hpring zup ai htani htana asak de du wa lu na rai nga ai.
