Daini na Ja Chyum Mungga hpe hti sum ru yu ai shaloi e, Madu Yesu hpe Namik Kumla madun na matu hpyi shawn ai lam na lu ga ai. Ndai Hparishe masha ni gaw Mdu Yesu hpe chyam mayu ai myit hte namik kumla hpe hpyi ma ai. Shanhte gaw Madu Yesu hpe mara tam jahpoi asawng na matu re hpe Yesu chye ai. Kaja wa namik kumla ra sharawng ai n re hpe Yesu chye ai. Dai majaw Madu Yesu gaw ndai amyu sha ni hpe hpa namik kumla mung n madun ai rai nga ai. Dai zawn sha shiga madat ni yawng hte e, tinang a Madu Karai Kasang hpe myit masin N-gup Aga hte pi n mai shut nga ai lam anhte hpe sharin ya nga ai.
Anhte a prat hta e Madu Karai Kasang hpe n kam ai, chyam dinglik yu ai lam ni n mai galaw ai hpe sadi nga ga. Karai Kasang gaw mahkra dang chye ai wa re majaw, anhte a myit kraw lawang kata yawng hpe shi chye ya lu ai. Anhte a lit gaw Karai Kasng hpe myit masin ninggun yawng hte, tsawra hkungga daw jau chye na ahkyak la nga ai. Anhte a sak hkrun lam hta, Madu Karai Kasang hpe chyam yu ai, n kam ai myit hte Karai Kasang kaw akyu hpyi ai lam hpe koi yen nga ga law.