Daini na Ja Chyum Mungga hpe anhte hti sum ru yu ai shaloi e, Hparishe ni a Matsi lam hte seng ai hpe na la lu ga ai. Yesu gaw shi a Sape ni hpe tsun ai gaw, nanhte Hparishe ni a matsi hte Herod a matsi hpe sadi na lam aja wa tsun da nga ai. Matsi hte bung nga ai Madu Yesu a mungga hte kyu hpyi ai shaloi, Muk tawng manga gaw, masha hkying manga a matu alaw ahtam hku sha lu nga ai. Bai Yesu gaw, shi a hpang hkan nang ai masha hkying Mali a matu, Muk tawng sanit hpe shi ahkyep jaw ai shaloi e mung, adaw achyen dang Sanit pi naw lahkawn la lu ai lam na chye lu ga ai.
Tsawra shiga madat nu wa ni yawng hte e, Karai Kasang lawm yang n mai byin ai lam hpa n nga ai. Matsi gaw shadung muk hpe shawawm ya ai, shalaw shahtam ya lu ai atsam nga ai zawn, Karai Kasang a Ja chyum mungga mung hte rai yang shadawn n dang ai mungkan lam wenyi lam ni hta chyeju law law wa jaw ya lu ai re. Dai majaw Madu a mungga hta sak hkrung hkawm sa chye ai wa a matu, chyeju gaw tut nawng jaw ya nga ai hpe hkap la kam sham let, Madu a sak hkrung mungga hta kam hpa manoi nga sa ga law.