Daini na Ja Chyum Mungga hpe anhte hti sum ru yu ai shaloi e, Betsaida Mare Na Myi kyaw ai wa hpe Yesu Shamai ya ai lam na la lu ga ai. Ja chyum mungga hta anhte na lu ai hte maren, Ndai myi kyaw ai wa a myi hta Yesu gaw, mayen hte madit ya nna shamai ya ai shaloi e nau n san ai. Dai majaw hpang kalang myi a ntsa hta, Yesu Ta mara let shaman ya ai shaloi e, asan apra rai, Myi majing bai mu lu ai lam na la lu ga ai. Ndai mabyin gaw, anhte a wenyi lam hpe sumru dinglik yu mai nga ai. Anhte a hkum hkrang wenyi hta e shinggyim masha ni rai ga ai majaw, galaw shut lai wa ai mara ni kap nga chye ga ai.
Dai shut hpyit mara hpe shatsai kau na matu Mara raw Sakramentu chyeju kumla hpe Karai Kasang jaw da ya sai. Dai chyeju kumla hpe ya sha ya sha hkam la ai rai yang e, tinang kaw kap nga ai shut hpyit mara tsai mat nna, madu a man hta san seng san pra ai ni tai na teng sha re. Dai majaw Karai Kasang shi hpan tawn da ya ai san seng san pra ai prat hpe lu madu nga lu na matu jahkring hkring mara raw Sakramentu chyeju kumla hpe lu hkra shakut sa ga law.