Daini na Ja Chyum Mungga hpe hti sum ru yu ai shaloi e, Yesu gaw Hkristu re ai lam Petru yin la ai lam hte Yesu shi nni nkri hkrum na lam shawng na lang tsun ai lam ni hpe na lu na ga ai. Madu Yesu gaw shi a Sape ni hpe Ngai kadai re ai ngu masha ni tsun nga ma ta? ngu san ai shaloi, Yawhan Baptista, kaga ni gaw, Elia re. Bai n kau mi gaw Myihtoi langai ngai re ngu htan ma ai. Shaloi Sape ni hpe san yang Petru htan ai gaw, Nang gaw Hkristu ngu ai Messia re ngu htan dat nu ai. Shing rai anhte mung Madu Yesu hpe gara hku mu mada nga ga ai kun? Myit yu ga. Hkristu ngu ai Messia Hkyela Madu re hpe nang teng sha lu hkap la nga ai kun?
Matut nna, ndai Messia ngu ai Hkyela Madu hpe Tara sara ni, Hparishe Myihtoi ni gaw, shi hpe n hkap la nna shi hpe jen noi zingri zingrat, nni nkri hkrum na re lam hpe shi shawng nnan lang tsun da nga ai. Anhte mung tinang a hkye la Madu hpe dai Hparishe hkinjawng ni zawn, ningdang nyet kau ai ni, jahpoi asawng jeyang ai ni n byin hkra shi Madu kaw kam hpa let hkawm sa nga ga law.