Wa Sarabyin Francis kawn lai wa sai Laban shani e galaw ai Arm Forces Jubilee Missa hkungga hta anhte a atsam hpe Madu hta ap da nna nhkring nsa kyu hpyi ai lam gaw anhte a Magam bungli a matu n-gun atsam a npawt re ai lam hpe tsun lai wa ai. Bai nna garum shingtau ya nga ai ni hpe Madu anhte rau rai nga ai zawn shanhte mung anhte a ka-ang hta rai nga ai hpe tsun let shakawn ga hpe tsun lai wa ai.

 “Kawa Karai Kasang a Tsawra Myit a Gwi ai Sakse ni anhte tai ga”  

Wa Sarabyin Francis kawn Arm Forces, Police and Security Personnel ni a matu galaw lai wa ai Laban Jubilee hta San Yawhan a Chyum daw hpe la kap nna Gannesarat hka makau hta Madu Yesu galaw lai wa ai lam hpe hpan masum hku nna tsun sang lang dan lai wa ai.

Anhte ni hta yawng Sum mat ai zawn raitim Karai Kasang Jaw ai Myit mada lam gaw hkam jan lu ai atsam hpe jaw ya nga ai.

Shawng nnan hku na (First) Wa Sarabyin kawn Madu Yesu gaw masha hpe ginhka lu ai Myi hte yu mai nga ai, dai majaw Hka hkinggau de shana tup Nga hkwi ai raitim nlu na myitru ai nsam hte shakaw na matu sa wa ai Hkali Lahkawng gaw shanhte a Nga rim ai singgawn hpe kashin taw ai hpe shi mu ai lam tsun lai wa ai.

Madu Yesu shanhte hpe Tsawra Matsan dum ai myit hte yu taw nga ai re hpe mung tsun lai wa ai. Ndai zawn Madu Yesu shi myit tsang let yu nga ai hpe anhte mu chye lu ai hte maren Karai Kasang a ni htep ai lam, si mani ai hte tsawra matsan dum ai hpe mung galoi mung nmai malap kau ai hpe tsun lai wa ai.

Dai hpang Wa Sarabyin gaw nsa sa nhkru ai ana ai majaw Shi a Mungga (homily) hpe matut nna hti shalai tsun ya na matu Archbishop Diego Ravelli hpe tsun lai wa ai. Wa Sarabyin gaw lai wa sai lahkawng masum ya ram hta yuhkraw machyi ana byin da ai rai tim shi galaw ang ai magam lit ni hte zuphpawng hpe shi nga ai shara rai nga ai Casa Santa Marta kaw galaw lai wa ai hpe mung chye lu ai.

Daw Lahkawng hku na (Second) Wa Sarabyin kawn Madu Yesu gaw Petru a myitru myittsang ai hpe mu nna shi a prat a myitru myittsang lam ni hte mayak lam ni hpe rau garan gachyan na matu Petru hpe hka hkinggau kaw nna Hkali hte rawt nna matu tsun lai wa ai hpe anhte ni myit dum mai ai lam tsun lai wa ai.

Ndai lam gaw laklai ai lam rai nga ai hpe Wa Sarabyin kawn tsun lai wa ai. Madu Yesu gaw anhte zawn n kaja na shut taw ai hpe azim sha rai na n yu shalai kau ai sha dai na gaw nmai byin sai ngu nna myit daw nga ai Petru a makau de sa nna shi hte rau aten jaw shaga let shi hpe kalang bai hka hkinggau kaw nna hkali hte rawt na matu galaw lai wa ai hpe anhte ni matsing da mai ai lam re hpe tsun lai wa ai.

Masum ngu ai hta (Third) gaw Madu Yesu gaw Hkali ntsa hta du ai hte rau kalang lata matsun ai hpe Wa Sarabyin kawn madi madun lai wa ai. Madu Yesu gaw myi grip mi laman yu dat ai hte dai Nga hkwi ai ni shana tup nga hkan tim hpa nlu ai majaw shanhte a masin salum hta myit yawn myit ndik ai hpe mu ya nga ai majaw Shi gaw Karai Kasang a kabu gara Shiga hpe htawn tsun na hte nsin chyip rai nga ai hte myitru myittsang lam hkrum nga ai hpe nhtoi jahtoi ya na matu, bai nna anhte a prat hta mayak law law ni hta Karai Kasang a tsawm htap ai lam hpe tsun dan na matu hte anhte ni hta yawng hkrat sum mat sai ngu myit la ai aten hta Karai Kasang a myit mada lam gaw anhte hpe kalang bai hkam jan lu ai atsam hpe jaw ya nga ai hpe hkali hku nna tsun shadum ai hpe chye lu nga ai.

Mau Hpa Mabyin

Wa Sarabyin kaw nna Karai Kasang gaw anhte a prat ngu na hkali de shang nna anhte hpe shi a nhtum nwai ai tsawra myit hte kabu gara shiga jaw ya ai hpang galaw mayu ai myit ni bai shadut ai byin wa ai, myit mada ai ni bai nga wa ai, bai anhte a prat mung nnan bai gaw gap lu ai hte maren anhte a singgawn hpe kalang bai Panglai de mai jahkrat sai lam hpe tsun lai wa ai.

Wa Sarabyin kawn dai ni galaw ai Arm Forces,Police and Security Personnel ni a Jubilee na Missa hkungga hta Matsing hpa hku nna Myit mada lam (hope) hpe tsun shadum lai wa ai.

Wa Sarabyin Francis kaw nna Magam gun nga ai ni yawng hpe shakram ai hte shanhte ni a ap nawng ya ai hpe chyeju dum ai lam tsun lai wa ai. Nanhte ni atsam gaw gwi ai atsam rai nga ai .Wa Sarabyin Francis kawn anhte a Mungdan hpe makawp maga ai,shim lum lam matut nna galaw lajang ai, tengmang ai hte tara rap ra ai lam hpe galoi mung manoi da nna mung masa hte kanawn mazum lam hte seng ai gin lam amyu myu hpe hkap la nna madang tsaw ai hku galaw ai Sasana langai hku nna “Nanhte yawng hpe”(All of you) kam tawn da sai re hpe tsun lai wa ai.

Matut nna laksan hkring ni, rip kawp tara ni gaw nang gadai re ai hpe shapraw ya nga ai, dai gaw Gwi ai atsam rai nga ai, nang hkam la da ai Ga sadi ni gaw “n hkru n gaja ai” (Evil) hpe mu nna shiga jaw na matu sha n-ga, ndai lam ni yawng gaw, n hkru n kaja ai lam hpe tsun dan na matu mu ai sha n-ga, nbung laru a majaw htingnut mat ai sanghpaw li hta jawn nna, n hkru n kaja ai lam  hta n hkrat sum hkra galaw na matu mung ahkyak ai lam hpe shadum tsun lai wa ai.

Hpang jahtum hku nna Wa Sarabyin kaw nna anhte a mare kata ni hte makau grup yin ni hta tara rap ra lam hpe hkan sa na matu nang nga nga ai hte makawp maga ai lam n nga ai ni maga de tsap ya ai lam gaw anhte yawng a matu lecture (lesson) rai nga ai ngu tsun nna“Anhte a matu mahkra hpe awng dang lu hkra sharin ya ai gaw Mai kaja lam rai nga ai ai hpe tsun lai wa ai.