Daini na Ja Chyum Mungga hpe anhte hti sumru yu ai shaloi e, Yesu a Sape wa a Myit Sat lawat hpe na chye lu ga ai. Madu Yesu gaw, Shi a hpang hkan mayu ai wa kadai raitim mung, tinang a hkum hpe nyet kau nna, tinang a Udang hpai let Shi kaw hkan nang ra ai. Bai Shi a matu hte kabu gara shiga a matu, tinang a asak sum hkam ai wa chyawm gaw, htani htana asak hpe hkye la lu na ra ai. Ndai chyum mung ga hpe anhte ni, lang hte lang hti ga, na ga sana re, anhte, tsun yang loi la nga ai. Raitim hkan galaw shatup sa na matu, n loi la ai gaw hpa tsun shara n nga nga ai. Ndai Udang lam gaw, tinang a yaw shada ai lam ni hte kaga ga re.
Tinang a byin mayu ai, galaw mayu ai lam mahkra hpe Shi madu a ra sharawng ai lam, byin shangun mayu ai lam ni hpe chyu sha, madung da hkan galaw sa ra ai prat re hpe n mai malap nga ai. Dai re majaw, shinggyim masha langai mi a myit masa arawn alai hte gaw, yak na teng sha re. Karai Kasang kaw na htani htana asak lu la na matu gaw, shani shagu tinang a myit hpe madung nda ai sha hkawm sa ra ga ai. Shi Madu ra sharawng ai, byin shangun mayu ai lam hpe hkan sa let Karai tsawra ai kasha ni byin hkra hkawm sa nga ga law.
