“Shi Chyawm daw, nam mali de sit yen sa mat wa nna akyu hpyi nga ai”Luka 5: 16
Tsawra ai nu wa ni, Shaining law law hpung masha tai nna nawku hpung hta shang lawm nga ai ni anhte gaw “Karai Kasang hte tinang hkrai lak san aten la ai lam gaw Shi hte anhte a lapran na hku hkau matut mahkai ai lam a matu grai ahkyak ai lam re” nga nna tsun shadum ai na yu na sha rai nga ai. Anhte a sak prat hta Karai Kasang hte tinang hkrai dinghkrai aten la nna akyu hpyi ai gaw hpa majaw ahkyak nga a ta? Nawku jawng sa, shawa akyu hpyi hpawng kaw shang lawm, chyum laika hti sumru hka ja ai hte n ram a ni? Mahhtai hkrak n lu yu na re. Matut nna shi hte grau ni htep ai hku dinghkrai aten la akyu hpyi ai lai len hpe matut galaw sa wa lu na matu gaw hpa majaw ahkyak ai ngu ai hpe chye na da na ahkyak ai ngu kam ai. Chyum mungga hta Madu Yesu shi hkum nan Sumsing na Kawa Karai Kasang hte shi hkrai aten la akyu hpyi ai lam asan sha tsun da nga ai. Luka laika 5:16 tsun ai gaw “Shi Chyawm gaw, nam mali de sit yen sa mat wa nna akyu hpyi nga ai.” Marku laika 1:35 hta mung “Jahpawt manap jau, nhtoi garai nhtoi yang, Shi gaw zaibru jand de rawt sa mat wa ai. Shi dai yang e akyu hpyi nga ai” nga nna Madu Yesu gaw shawa masha ni hte hka nna shi hkrai sha Kawa Karai Kasang hte matut mahkai akyu hpyi ai lam mu lu nga ai. Shawng nnan hpa majaw ahkyak a ta nga yang Madu Yesu Shi hkum nan galaw lai wa ai majaw re ngu htai mayu ai. Madu Yesu shi hkum nan pyi Karai Kasang hte shi hkrai laksan aten la ra yang gaw anhte grau nna pyi Karai Kasang hte tinang hkrai laksan aten la ra na re. Madu Yesu gaw shi a prat tup Karai Kasang myit ra ai hpe sha hkan galaw nga ai. Ndai gaw shi Kawa Karai Kasang hta galoi mung manoi nga nna Shi hte rau sha hkawm sa taw nga ai majaw rai nga ai. Karai Kasang hte tinang hkrai laksan aten la akyu hpyi ai a marang e Karai Kasang a myit yaw shada ai lam hpe grau chye wa lu nna Shi myit ra ai hte maren sak hkrung lu na mau hpa atsam lu la nga ai hpe Madu Yesu a kasi kaja hku nna anhte mu la mai nga ai. Shi hkrai Karai Karai Kasang hte laksan aten la akyu hpyi ngut ai hpang she Madu Yesu gaw mau hpa lamik kumla ni hpe shabyin ai lam hpe mung Luka laika daw kaba 4 hta asan shat ka da nga ai. Madu Yesu gaw Tsanlun sun hta sharung sharawt nna “ndai gawm hpe ngai kaw nna la kau ya mai yang la kau ya rit” nga nna Kawa Karai Kasang hpe hpyi nem ai raitim Karai Kasang hte laksan shi hkrai aten la nna kyu hpyi la ngut ai hpang gaw Udang hkrun lam hpe gwi gwi hkawm na matu atsam lu la ai hpe mung mu lu nga ai. Dai re majaw Karai Kasang hte laksan tinang hkrai aten la akyu hpyi ai lam gaw anhte a shani shagu na Udang hpe hpai lu na atsam lu la ai sha n-ga Karai Kasang a yaw shada ai lam hpe grau chye wa shangun ai hte Shi myit ra lam hta hkawm sa lu ai atsam jaw ya nga ai hpe shadum mayu ai. Hpang jahtum hku nna Mahte laika 6:5-6 hta “Nahte akyu hpyi ai shaloi, sawt ai masha ni zawn hkum raimu; kaning rai nme law, masha ni e shanhte hpe mu lu mu ga, nawku jawng ni hte mare lam nshe hkan tsap nna akyu hpyi na shanhte ra sharawng ma ai. Ngai nanhte hpe teng teng tsun nngai; shanhte gaw shanhte a shabrai lu la ma nu ai. Nanhte mahtang akyu hpyi ai shaloi, tinang a gawk kata de shang nna chying hka hpe la da nhtawm, ndan ndawng ai shara e nanhte a Kawa kaw hpyi mu; nda ndawng ai shara e mu lu ai nanhte a Kawa gaw nanhte hpe htang jaw na ra ai” nga nna sharin ai hte maren Shi hte laksan tinang hkrai aten la kyu hpyi ai ni hpe Karai Kasang nhtang shaman ya nga ai hpe dum nga ga. Shi hte laksan tinang hkrai aten la akyu hpyi ai ten hta Karai Kasang a tsawra myit hpe mung grau chye na hkam sha wa lu ai; Chyoipra ai Wenyi a lam woi ai hpe mung grau hkam la lu wa ai; Karai a myit ra yaw shada ai hpe mung grau chye na hkap la lu wa ai; Shi hte grau ni htep wa lu nna Shi a chyeju gaw anhte a prat hpe ka-up da ya nga ai hpe dum nga ga. Tsawra ai nu wa ni ndai mungkan hta ja gumhpraw hte mari la n lu ai chyeju ni Shi Karai Kasang jaw ya nga ai; ndai mungkan kaw nmai lu ai myit pyaw myit dik ai lam ni hpe Karai Kasang jaw ya nga ai. Shi hte laksan aten la akyu hpyi ai lam hku nna ya ya nan ndai akyu ni hpe hkam la ga ngu n-gun jaw dat ai.
