Nang Mungkan ga hpe akyu jaw ai, Mungkan ga hpe ninghtoi jaw mayu ai, Mungkan ga hpe lam madun mayu yang No ( 1 ) Karai Kasang a Mungdan hpe shawng tam u. Tengman dinghpring ai lam shawng tam u.

Anhte shinggyim masha gaw tinang hkum tinang grai shakut timung n lu ai, anhte shinggyim masha gaw Karai Kasang a chyeju n lawm yang atsam n nga ai, kade myit malai tim Karai Kasang kaw akyu sha n hpyi yang anhte myit masin hpe galai shai na grai yak ai. Dai majaw myit malai mayu yang, kaja ai galaw mayu yang, masha hpe tsawra mayu yang, masha hpe mara dat mayu yang  akyu nan hpyi ra ai.

Daini anhte, nanhte grup yin hta e ru yak jam jau, yawn hkyen myi prwi hte anhte hkawm sa taw nga ai. Ndai ru yak jam jau gaw anhte ni n kaja galaw ai majaw Karai Kasang anhte hpe dingnye jaw ai rai sai ngu shadu chye ai. No dingnye n re,  shaman chyeju jaw na matu anhte ru yak jam jau hpe hpai taw ai re. Madu Yesu jam jau hkam nna Wudang hpai ai gaw  dingnye n re. Anhte a ruyak jam jau yawn hkyen myiprwi ndai hpe e akyu jashawn yang dai yawn hkyen myiprwi gaw Wudang rai nga ai. Anhte ru yak jam jau, yawn hkyen Wudang hpai taw ai ten hta Udang kaw Madu Yesu kap taw ai re. Nang dai hpe kaman lila hkum shatai kau u.

Nang ru yak jam jau hkrum taw ai ten hta nang ra ai akyu yawng hpyi la u. Nang pyaw ai ten hta gaw Karai Kasang hpe shakawn u, Karai Kasang hpe chyeju dum u, akyu hkum hpyi sa, Karai Kasang hpe shakawn yang Karai Kasang mung pyaw ai.

Kanu kawa, kaji kawoi ni daini Jubali shaning hta e kashu kasha ni hpe shaman ya u. Jubali shaning hta laklai ai chyeju lu na re. Jubali shaning hta e shagrit shanem ai hte myit masin hpe jasan jaseng nna na a hpyen hpe mara dat ya u, na lusu nga mai ai lam hpe masha ni hpe garum u, nang jaw ya lu ai wa hpe sha nang jaw na, nang hpe sha shakawn ai wa hpe nang jaw ai rai yang shaman chyeju n lu ai. Nang hpe bai n ginhtang jaw lu ai wa hpe jaw u, Karai Kasang nang hpe shi a malai shaman chyeju jaw ya na re. Jubali chyeju Karai Kasang gaw anhte yawng hpe jaw ya u ga.