Daini na Ja Chyum Mungga hpe hti sum ru yu ai shaloi e, Nat Shung ai La sha hpe Yesu shamai ya ai lam na la lu ga ai. Kalang mi na mahkrum madup hta e, tarahkaw sara wa gaw Num langai mi Nat shung ai majaw, Jau hpe Nat gawt kau ya na matu wa shaga ai. Jau mung hkan sa wa nna, dai nat shung machyi taw ai jan a nta de shang wa ai shaloi e, dai machyi ai jan gaw jau hpe mu ai hte mani nna shi hpe yu nga ai. Shaloi e jau mung shang wa nna kyu hyi ya let Nat hpe gawt shale ai shaloi, hpa laklai ai lam mung n nga tem si sha rai taw nga ai. Shaloi jau mung myit htum wa ai hte Shi a jawng de bai n htang wa nna, kaga jau hpe mabyin lam tsun dan let, kaga jau bai sa wa nna dai nat hpe kyu hpyi gawt kau lu ai.
Mahtai gaw asan sha rai nga ai nu wa ni, Wenyi a kanu kawa tai nga ai ni yawng hpe ndai Marku a kabu gara shiga 9:14 – 29 na ja chyum mungga aja wa tsun sharin shaga ya sai. Anhte Karai Kasang a magam gun ai ni, tinang kade ram wenyi lam hta akyu hpyi shakut ai (sh) gawng kya nga ai ngu ai gaw, hpaw tsun dan pi n ra nga ai. Anhte ni a tsun shaga ai galaw sa wa ai sat lawat ni hta dan dawng nga ai. Dai majaw Karai Kasang hte matut mahkai ai lam hta n’gun dat let hkawm sa nga ga law.
