Daini na Ja Chyum Mungga hpe anhte hti sum ru yu ai shaloi e, Karai a mungdan e kaba dik ai wa gaw kaning re ai wa re lam hpe, tsun shadum ya nga ai. Ya dai nianhte hpe chyum mungga sharin ya ai hta, ning baw tai ai wa gaw, yawng a matu ap nawng daw jau ya chye ai wa rai ra ai. Bai nna yawng a matu shangun ma nan mung re ai hpe n mai malap ai. Bai ningbaw ngu ai ni gaw Ma kaji langai hta rawng ai myit masa mung rawng nan rawng ra ga ai. Ma kaji ngu ai ni gaw, dingman ai, myit masin san seng ai, masu magaw nchye tsun ai ni re, jaw ai hpe jaw ai hkrak tsun chye ai.
N jaw ai rai yang mung asan sha tsun shapraw chye ai majaw, yawng gaw grai tsawra ma ai. Dai zawn re ai myit masa hte hpring zup ai ma ni chyu sha Karai a mungdan hta e, kaba dik ai ni rai nga ma ai. Shingrai nang ngai mung, dai ma kaji ni zawn re ai, mai kaja ai lai kyang rawng ra ga ai. Manawn masham masu magaw ai, myit marin namak law hpa ai lam ni hpe koi yen nga sa ra ga ai. Shaloi e Sumsing mungdan gaw, dai zawn re ai ni a shara nan re hpe madi madun ya nga ai. Anhte yawng mung dai sumsing mungdan hta e kaba dik ai ni byin tai lu hkra ya kaw nna shani shagu shakut sa nga ga law.
