Daini na Ja Chyum Mungga hpe anhte hti sumru yu ai shaloi e, masha kaga hpe shut hpyit mara de du shangun ai wa a, mabyin lam hte seng ai, sharin achyin ya ai lam ni hpe na lu ga ai. Moi shawng na hkristan hpung masha ni a, makam masham kade ram ngang kang ai ngu ai hpe chyum laika hta e anhte ni na lu nga ga ai. Rai yang e kade ram yu mau, na kajawng na zawn re ai ngu ai gaw, hpa kam shut shara n nga ai. Lama na tinang a lagaw gaw nang hpe shut hpyit mara galaw shangun ai rai yang, dai lagaw hpe kahtam di kau u. Lagaw lahkawng gum ai hte Ngarai wan de jahkrat kau ai hkrum na hta, lagaw maga mi hte sha sak hkrung ai hte shang na mahtang grau mai nga ai.
Shingrai dai ni ja chyum mungga hta, anhte hpe ja ja shi Madu bai shadum ya ai nga ai gaw, kaga masha wa hpe shut hpyit mara de du shangun ai, n’gun jaw ya ai, dai shut hpyit ai lam de woi sa ai wa kadai hpe raitim, shi a du hta li dik ai htum rin kaba noi da na, sung dik ai panglai hka de kanawng bang kau na mahtang, shi a matu grau mai nga ai ng anna Madu Yesu shadum nga ai. Shingrai anhte kaga masha ni hpe shut hpyit mara hta e, lam woi shadam ai rai yang kade ram hkrit tsang hpa, kade ram ari dan hkam ra ai hpe dan dan leng leng shadum ya ai hpe matsing sumhting la let, jaw kaja ai arawn alai shi madu ra sharawng ai hktistan prat hte sak hkrung hkawm sa lu hkra shakut nga ga law.
