Daini na Ja Chyum Mungga hpe anhte hti sumru yu ai shaloi e, Hkungran Ai Hte Jahka Ai lam hte seng ai tara lam ni hpe na la lu ga ai. Dai ni na (Mk 10: 1- 12) hta na ja chyum mungga gaw, Ya kun dinghku de taw nga ai, dinghku shagu a matu ahkyak dik ai Karai Kasang a hkang da ai tara lam nan re. Ndai tara lam hpe hkan lang hkan sa na lit kaba nga nga ai hpe dum ra ai. Hpa majaw nga yang e, Kahtawlik nawku hpung masha langai a matu, kun dinghku de na shaloi, mayu dama maga lahkawng yan myit hkrum ra ai. Dai hte maren, kun ding de na matu Num Hkungran ai chyeju kumla hkam la ra ai re.
Dai chyeju hkam la ai shaloi, Yesu a malai rai nga ai Jau hte sa du kyu hpyi lawm ai hpung masha ni yawng a man e hkungran ai chyeju kumla Ga sadi hkam la ra ai. Dai Ga sadi ni hkam la ngut ai hpang, NUM n`nan hte LA n`nan yan hpe wa jau gaw, Shan lahkawng hpe Karai Kasang matut da nu ai hpe masha gaw n jahka u ga. Shaloi shan hpe tinang a madu jan hpe jahka kau nna, kaga num hpe hkungran la ai wa kadai raitim shi a madu jan hpe shut ai amu galaw sai. Dinghku Num mung tinang a madu wa hpe jahka kau nna, kaga la kaw wa ai rai yang, La shaw ai shut hpyit mara galaw nu ai. Ning nga nna Madu Yesu ja ja dai Ga sadi hpe tsun shadum sai. Dai ga sadi prat tup a matu re hpe dum let, grin nga ai dinghku ni byin hkra shakut sa ga law.
