Pranwan Ladaw Laban ( VIII ) Shaning C, 2025
( Karai Kasang a Mungga )
Hkristu hta tsawra hkungga ai nu wa hpu nau ni ndai laban gaw Shaning C a Pranwan Ladaw Laban ( VIII ) rai nga ai…Ndai bat hta na la lu na Ja Chyum Mungga Daw Langai : Sirach a laika 27: 4-7 hta n kaja ai namsi hpe hpun na garai n di la shi yang masha langai a myit masin hpe chyam na mat,u ga shaga ai hku na san jep u..kaja ai namsi hpe hpun na di la ai zawn, masha langai a myit masin na kaja ai myit jasat ni hpe shi a shaga ai hku na chye lu nga ai..tsun mayu ai gaw masha langai a myit masin majing hte tsun shaga ai..lapran na matut mahkai nga ai lam hpe madun dan nga ai..masha langai a jet ai myit masin majing hpe chye lu na matu tsun shaga ai gaw ahkyak nga ai lam shadum da ya nga ai.
Chyum Mungga Daw Lahkawng 1 Cor 15: 53-58 hta satan a majaw si hkrum ai lam gaw shinggyim masha ni a matu hkrit hpa lam rai nga tim Yesu Hkristu a hkrung rawt ai lam a marang e si hkrung sihtan hpe dang kau lu sai rai nga ai..dai zawn re ai hta myit mada ai hte kam sham nga ai kashu kasha ni gaw ngang ngang tsap let shaman chyeju hkam la lu na matu tut nawng e shakut ra ai lam tsun shadum da nga ai..bai nna hkristan prat hpe grau kaja hkra galai shai wa lu shangun ai lam rai nga ai hpe mung madun dan nga ai…hkrit tsang ai lam kaw na kam sham ai de..myit daw hten ai kaw na myit mada shara de..gawng kya nga ai lam kaw na n -gun ja ai de byin shangun nga ai..hpa majaw nga yang anhte myanmar mungdan hta tsinyam hkrum ai lam ni.. hkamja lam manghkang ni..shingnrai shinggyim uhpung uhpawng ni a majaw myit daw myit hten byin wa chye nga ai..ratim ndai chyum mungga gaw shi hkrung si htan hpe dang kau lu ai Madu yesu a lam hpe tsun da nga ai..dai majaw madu hkristu hta anhte gaw yak hkak jam jau lam ni mahkra hpe dang kau lu ai anhte a karai kasang hku myit mada lam lu la nga ai..
Luka a kabu gara shiga hta Madu Yesu gaw myi n mu ai masha gaw myi n mu ai masha hpe lam madun lu na kun ngu nna ga san san lai wa ai..ndai lam gaw tinang a shut shai ai lam ni hpe n mu ai sha kaga masha ni a shut shai ai lam hpe sha mara shagun ai ni hpe tsun shadum ai hte masha ni a myit masin hte shanhte a galaw sa wa chye ai lam ni hte seng nna shadum da ai rai nga ai..masha wa a mara hpe mara shagun ai htan tinang hkum hpe shawng sharai na matu myit maju jung ra nga ai..matut nna Yesu gaw kaja ai hpun gaw n kaja ai asi hpe n si chye nga ai..n kaja ai hpun mung kaja ai asi hpe n si lu ai ngu nna tsun lai wa ai..ndai lam gaw masha a myit masin hte shanhte a kyang lailen ni hte seng nna madi madun ya ai.. kaja ai myit masin kawn kaja ai kyang lailen ni pru wa ai hte n kaja ai myit masin kawn n kaja ai kyang ni paw pru wa ai rai nga ai. dai majaw anhte gaw tinang a myit masin hpe kaja ai hku makawp maga da na matu tsun da nga ai..
Shawng nnan e mabyin lam langai mi hpe tsun dan mayu ai dai gaw hpaji ninghkring kaba langai a mabyin kaji rai nga ai..ndai mabyin gaw ahkyak ai shinggyim sat lawat langai hpe sharin ya ai lam mung rai nga ai..dai gaw kaga masha ni hpe shagrit kau nna tinang hkum hpe sharawt la na matu n mai shakut la ai lam rai nga ai..lani mi na jahpawt daw e ma langai gaw dai sara kaba hpang de sa nna tsun ai..sara kaba e nye a kahpu kanu ni marai kru yawng hte yup pyaw taw nga ma ai.. ngai chyu sha rawt nna Karai Kasang hpe nawku nga ai..ngu nna shi galaw ai lam sara kaba hpe bai tsun dan ai shaloi sara wa bai tsun dat ai gaw.. na a kahpu kanau ni hpe mara shagun nna nang karai kasang hpe nawku ai nga yang gaw nang mung yup taw nga yang grau kaja na re ngu nna tsun dat lam rai nga ai.
Tsawra ai nu wa hpu nau ni ndai mabyin gaw anhte hpe kasi la hpa lam langai sharin ya nga ai..tsun mayu ai gaw kaga masha ni hpe shagrit tsun nna tinang hkum hpe shatsaw la na matu n shakut ging nga ai lam rai nga ai..tinang a tingkyeng awng dang lam a matu kaga masha ni a shut ai lam hta gawgap la ai lam n mai galaw ging nga ai shadum ya ai..de a malai tinang hkum nan kaja dik galaw nna tinang jaw dat ai hpaji jaw ga ni hte maren tinang hkum nan shawng hkan sa lu na matu shakut ra nga ai.
Ndai Bat na kabu gara shiga hta Madu Yesu hkristu gaw tinang a myi hta hpun tawng kaba rawng nna kaga masha wa a myi kata na nbun hpe shaw kau mayu ai ni a lam tsun da ai..n bun ngu ai gaw hpun kaba ni hte shingdaw yang grai kaji ai rai nga ai..Madu yesu gaw masha wa a mara hpe yu nna tinang a mara kaba hpe hpa zawn n nawn da ai myit jasat hpe daru ahkye da ai lam rai nga ai…tinang a gawng kya lam ni hpe n mu ai sha masha wa a shut shai gawng kya lam hpe yu ai gaw gumrawng gumtawng ai lam hte magi magaw ai hte nkaja lam rai nga ai hpe shadum tsun lai wa ai rai nga ai.
Dai zawn re ai myit jasat gaw shinggyim masha ni a myit masin hta jahkring hkring byin pru chye ai yubak mara langai mung rai nga ai. anhte gaw masha wa a mara hpe dinglun na matu gaw grai loi ai raitim tinang hkum nan a gawngkya lam hpe mu mada na matu gaw grai yak la nga ai. Madu Yesu gaw dai zawn myit jasat hpe galai shai lu na matu n gun jaw shadum da nga ai. bai tinang hkum bai sawn sumru yu nna tinang a mara hpe yin la na matu..bai dai zawn galaw yang she kaga masha ni a shut ai mara hpe chye na wa ai hte myit tau garum lu na re lam sharin achyin ya ai. masha wa a mara hpe dinglun nna tinang a mara hpe n shading n sharai ai wa gaw shut ai akyang lailen rai nga ai hpe madi madun ya ai. masha wa a myi hta rawng ai nbun hpe anhte mara shagun nga yang tinang a myi hta rawng ai hpun tawng hpe gaw n gawn n sawn di ai rai yang anhte gaw hpa mahkrun mung n nga ai sha myi set lahkawng hpe lang nga ai hte bung nga ai. langai mi gaw tinang a matu jai lang nna tinang a mara hpe kaji kau shangun ai..langai mi bai rai yang gaw masha wa a mara hpe kaba shangun ai lam rai nga ai..dai zawn kyang gaw n ding n man ai lam hpe byin shangun nga ai..kaja wa gaw tinang a mara hpe kaba ai hku mahtang mu mada la ra nga ai..kaga masha wa a mara ni hpe chyawm gaw kaji kajaw sha mu mada ra nga ai. hpa majaw nga yang anhte gaw tinang a mara ni hpe atsawm sha chye nna mara ni hpe galaw ai lam a lachyum hpe chye da ai majaw rai nga ai..raitim kaga masha ni a mara hte shanhte a masa lam ni hpe anhte tup hkrak n chye lu ai majaw mung rai nga ai.
Dai majaw anhte gaw tinang a mara hpe hpun tawng kaba hku nna shawng mu mada let kaga masha ni a mara hpe nbun hku sha mu ging nga ai..san pawlu zawn tinang hkum nan mara kaba nga ai wa zawn hkam la chye ra nga ai.n kaja ai lam gaw tingkyeng ra sharawng ai lam kaw na pru wa ai rai nga ai..n hkru n kaja ai tingkyeng ra sharawng ai lam gaw yubak mara yawng a npawt rai nga ai..yubak mara yawng gaw anhte a myit sawn ai lam ni hpe nsin sin shangun ya ai..tinang a kaba la ai mara ni hpe n gawn n sawn di nna htingbu wa a mara kaji ni hpe tsun jahpoi ai masha gaw tinang a mara kaba ni hpe makoi.magap na matu htingbu wa a mara kaji ni hpe kaba hkra tsun ai lam galaw chye nga ai..htingbu wa a mara kaji ni hpe mara shagun ai hku na tinang a yubak mara kaba ni hpe jep joi ai lam kaw na lawt lu na matu shakut nga ai wa mung rai nga ai..kaja ai lam hpe tinang a n kaja ai prat hku makoi magap na matu shakut la ai..dai zawn galaw ai lam gaw tinang a mara ni hpe grau sawng shangun nga ai.
anhte dum chye ra ai mara hpan lahkawng nga ai. langai gaw tinang a yubak mara ni hpe kaji ai hku myit la ai chye ai..tinang galaw ai mara ni hpe kaba ai hku nsawn la ai masha hpan rai nga ai..lahkawng hta gaw kaga masha ni hpe n hkru n kaja ai lam hte matsan dum lama ai myit n nga ai sha dai zawn lam hpe shani shagu galaw nga ai.ndai lam hku nna n kaja ai tingkyeng myit ra sharawng ai lam ni gaw masha ni hpe yubak mara galaw shagun nna myit masin ja kau shangun nga ai hte hkrat sum mat shangun nga ai. Madu Yesu a sharin achyin ya ai lam ni gaw anhte a myit masin hte galaw ai lam ni hpe sadi maja na matu sharin ya nga ai..bai nna tinang a gawng kya lam ni hpe mu chye lu hkra shakut ra ai lam mung tsun da nga ai. anhte gaw kaja ai myit masin hte kaja ai asi si lu hkra shakut ra ai. dai zawn shakut hkawm sa ai rai yang karai kasang a hpung shingkang hpe shadan shadawng dan lu ai hte mungkan a sakse kaja ni anhte tai wa lu na re.
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta. matsat.. ngu na lanban rai nga ai
Hti Ang Ai Ja Chyum Mungga Ni Gaw
Chyum Mungga Daw ( I ) Sirach 27: 4-7
Chyum Mungga Daw ( II ) 1cor 15: 54-58
Kabu Gara Shiga : LK 6: 39-45
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law
