Myanmar Mungdan ting hta magam gun nga ai St. Paul Sasana ( MSP ) Mama Wuhpung hta na Mama kaba lit magam gun nga ai ni a laning mi a matu tinang a sasana magam hkrun lam hpe bai myit sumru n’gun awai la ai Wut Sawk hpe Yangon, Tan Lyn na St. Paul Mama jawng ( Mother House ) hta Febraury 24 – March 02 ya shani du hkra galaw lai wa ai.

Myit sumru hpawng wutsawk hta Wa Saradaw Kaba Cardinal Charles Bo Wenyi nshaw nshat jaw ya nna Mama ni marai ( 28 ) shang lawm ai.

Dai ning na Wutsawk gaw Myanmar Mungdan ting hta mung Jubali shaning ngu masat da ai hte maren St. Paul Sasana Mama wuhpung ni hku nna Jubali shaning hta tinang a prat hpe sumru dinglik yu ai, Karai Kasang hpe chyeju dum ra ai lam ni a matu chyeju dum ai, grau nna tinang Mama Wuhpung a hkan sa ra ai gawda tara ni hpe bai sumru dinglik lam galaw nna hkan sa galaw lu ai lam ni a matu Karai Kasang hpe chyeju dum ai, n lu galaw kau dat ai, n hkan shatup byin kau dat ai lam ni hpe mung bai dum sawn sadi sahka ai hte shawng lam Sasana magam bungli ni hta Mama prat a hkan sa ra ai gawda tara hte maren hkawm sa lu na shaman chyeju atsam ni hpe Wutsawk galaw ai a marang e Karai Kasang kaw na hkam la lu ai nga nna St. Paul Sasana Mama wuhpung a lit hkam rai nga ai Mama kaba Rufina kaw nna hpaw tsun da nga ai.

Wutsawk shangut chyeju dum Missa Hkungga ngut ai hpang Wutsawk lawm ai Mama ni yawng Jubali shaman chyeju hpe hkam la lu na matu Yangon St. Mary’s Cathedral Jubilee chyinghka de shang nna akyu hpyi ai lam galaw lai wa ma ai.

St. Paul Sasana Jau, Brother, Mama wuhpung hpe 25 May 1990 ning hta Wa Saradaw kaba Cardinal Charles Bo hpaw tawn da ai rai nga ai. Ya aten St. Paul Mama ni marai ( 123 ) nga ai lam chye lu ai.

Mama ni yawng Sasana magam lam hta ngwi pyaw hkam kaja, tengman dinghpring ai hte ap nawng gun hpai shakut lu mu ga.

Jubilee a shaman chyeju hpe hkam la lu mu ga!