Tsawra ai hpu nau ni e. Anhte gaw, shaning shagu na lusha gam ladaw aten hkawm sa ai lam hpe, kam sham myit mada ai lam hte rau hpang nga sai re. Ndai lusha gam ladaw hta anhte gaw shut shai ai lam kaw na myit malai lu ai kumla rai nga ai wanwu chya hkam la ai lam hte anhte hpang nga ga ai.
Chyoi Pra ai kanu Nawku hpung gaw, anhte a myit masin hpe hpaw nna Karai Kasang a chyeju hpe hkap la na matu saw shaga nga ai, dai hku nna, yubak mara hte si hkrung si htan hpe dang ai Madu Hkristu a Paschal awng padang poi hpe kabu gara ai hte shang lawm lu na matu, San Pawlu ndai hku jahtau tsun lai wa ai: “Si hkrung si htan gaw awng padang hte shamyit kau hkrum sai. Si hkrung si htan e, na a awng padang kanang nga a ta? Si hkrung si htan e, na a padang kanang rai nga a ta?” (1 Kor15:54-55).
Kaja wa nga yang, Wudang hta jen noi hkrum nna hkrung rawt wa sai Yesu Hkristu gaw, anhte a makam masham a npawt hte Kawa Karai Kasang a ga sadi rai nga ai. Shi tsawra ai Kasha hta jahpring satsup ya nga ai: dai gaw htani htana asak a matu myit mada lam a ga shaka mung rai nga ai (cf.Jn10:28; 17:3).[1]
Ndai Lusha gam ladaw hta, Jubilee Shaning a chyeju hpe anhte hkam la nga ai ten, myit mada lam hte rau hkawm sa ai ngu ai lachyum hte , Karai Kasang gaw shi a matsan dum lama ai hte anhte yawng hpe, jaw ya ai myit malai lu nna galai shai ai lam hpe anhte bai myit yu na matu tang madun mayu ai.
Ndai lusha gam ladaw ngu ai hkrun lam hta hkawm nga ai anhte gaw langai dinghkrai hku nna mung, wuhpung wuhpawng hku mung Karai Kasang a saw shaga ai hpe hkrum ai rai nga ai.
Shawng nnan e ,hkrun lam hkawm ai lam
“Pilgrims of Hope” ngu ai Jubilee ga baw gaw, Pru Mat Wa Ai Laika hta tsun dan ai hte maren, Ga Sadi Tawn Da Ai Mungdan de Israela amyu masha ni kabu gara ai hte hkawm sa wa ai hkrun lam hpe myit dum shangun nga ai.
Mayam prat kaw nna lawt lu wa ai shaloi dai yak hkak ai lam hta shi a amyu masha ni hpe tsawra nna, shanhte hpe tut nawng sadi dung nga ai Madu Karai Kasang ra sharawng ai hte lam madun ya lai wa ai. Anhte a prat hta, anhte hkum anhte hte tsawra ai ni a matu grau kaja ai prat hpe tam let, tsin-yam tsindam hte zingri zingrat hkrum ai masa ni kaw na hprawng hkawm nga ai hpunau ni hpe n myit yu ai sha, chyum laika hta lawm ai pru hkawm ai lam hpe myit yu na matu yak nga ai.
Shingrai, myit malai lu na matu shawng nnan na shaga la ai lam gaw, anhte yawng ndai prat hta hkrun lam hkawm nga ai ni re ai hpe chye na ai kaw na pru wa ai , anhte a prat hta ndai lam hpe gara hku madun dan ai hpe san jep yu na matu saw shaga ga ai lam rai nga ai.
Ngai gaw teng sha hkrun lam hkawm nga ai kun, shing nrai, n shamu n shamawt ai sha, hkrit tsang ai hte myit mada shara n nga ai a majaw n shamu n shamawt ai sha rai nga ai kun (sh) nye a shimlum nga ai shara kaw na pru na matu n ra sharawng ai hku tsap nga ai kun? Ngai a sari sadang hpe jahten kau shangun ai yubak galaw ai aten ni hte masa lam ni hpe tawn kau da na matu ladat tam nga ai kun?
Anhte a shani shagu na sak hkrung lam hpe bu htawt masha (sh) maigan masha nkau mi a sak hkrung lam hte myit tau yu ai gaw anhte a matu kaja ai lusha gam ladaw a hkan sa ai lam rai nga ai, shanhte a mahkrum madup ni hpe myit tau chye na matu hte ndai lam hku Kawa a nta de sa wa ai hkrun lam hta grau nna rawt jat galu kaba wa lu na matu hpyi shawn taw ai hpe mu tam na matu sharin la nga ga. Ndai gaw anhte hkrun lam hkawm ai ni yawng a matu kaja ai “myit masin hpe jep joi ai lam” rai nga ai.
Lahkawng, rau hkrun lam hkawm sa ai lam.
Nawku hpung gaw rau hkrun lam hkawm sa na matu, synoda byin na matu shaga la hkrum ai[2]Hkristan ni gaw kaga masha ni hte rau makau hta hkawm sa na matu shaga la hkrum ai, galoi mung langai hkrai hkawm sa ai ni hku na n mai rai ai.
Chyoi Pra ai Wenyi gaw anhte hpe tinang hkum myit maju jung nga ai hku n re ai sha, tinang hkum hpe tawn kau da nna Karai Kasang hte hpunau ni hpang de matut hkawm sa na matu shadut ya nga ai.[3]Rau hkawm sa ai ngu ai gaw Karai Kasang a kashu kasha ni hku nna anhte yawng a sari sadang hta npawt tawn ai kahkyin gumdin lam hpe ngang grin hkra galaw ya ai (cf.Gal3:26-28).
Kaga masha ni hpe n-gun n jaw ai, n-hkap la ai, manawn masham ai, masu hkalem ai lam n nga ai sha, kadai mung tawn kau da nhkrum ai hku, rau hkawm sa ai hpe tsun mayu ai rai nga ai. Anhte yawng bung pre ai lam langai sha hta hkawm sa nga ga, yaw shada lam langai sha de, tsawra myit hte hkam sharang myit galu kaba ai hte shada da myit tau pawn ba hkat ya nga ga.
Ndai lusha gam ladaw hta, Karai Kasang gaw anhte a prat, anhte a dinghku, anhte a magam bungli galaw ai shara ni hte, aten jahtum ai lam hta kaga masha ni hte rau hkawm sa shangun nga ai, shanhte a ga hpe madat mara ai, tinang hkum hpe sha myit maju jung nna ra kadawn ai lam hpe sha myit taw ai gunglau lam ni hpe ninghkap lu ai lam jep joi yu na matu hpyi shawn nga ai. Karai Kasang a Mungdan magam bungli hta Jau ni, ap nawng da sai ni hte hpung masha ni hku nna, kaga masha ni hte rau jawm galaw nga ai kun ngu ai hpe Madu a man e tinang hkum tinang san yu nga ga.
Anhte gaw makau grup yin hte tsan ai ni ai hpe hkap tau hkalum la ai lam hta hkum hkrang a dawshan langai hku hkam sha nga ai kun? Sh shanhte ni hpe tsan mat hkra galaw nga ai kun? [4]Rai yang, ndai gaw, myit malai lu na matu lahkawng lang ngu na hku saw shaga ai lam rai nga ai.
Masum, myit mada let rau hkawm sa ga.
Hpa majaw nga yang anhte hpe ga sadi jaw da chyalu rai nga ai. Myit mada lam gaw Myit n daw ai nhten shangun ai (cf.Rom5:5), Jubilee a madung kabu shiga,[5] gaw, lusha gam ladaw hkrun lam kawn Easter awng dang lam de sa wa lu na matu, rai nga u ga. Wa Sarabyin Benedict XVI gaw Encyclical Spe Salvi hta anhte hpe sharin shaga da ai hte maren, “shinggyim masha gaw hpring sup ai tsawra myit hpe ra kadawn nga ai.
‘si hkrung si htan mung, asak mung, lamu kasa ni mung, du salang ni mung, hpan da ai arai ni, n-gun atsam ni mung, tsaw ai arai ni mung, sung htum ai arai ni mung, nye a hpan da ai lam yawng hta nga ai hpa mung, anhte a Madu Hkristu Yesu hta Karai Kasang a tsaw ra ai myit hte anhte hpe garan ginhka kau lu na n rai’ (Rom:39). Hkristu gaw myit mada shara, hte bai hkrung rawt wa sai![7]
Shi gaw bai hkrung rawt wa nna hpung shingkang arawng sadang hte up nga ai. Si hkrung si htan gaw awng padang de galai shai mat nna, Hkristan ni a makam masham hte myit mada shara kaba gaw ndai hta nga nga ai:
Hkristu hkrung rawt ai ! Rai yang, ndai gaw, myit malai lu na matu saw shaga la ai lam masum rai nga ai: myit mada shara de, Karai Kasang hte shi a htani htana asak ngu ai ga sadi kaba hpe kam hpa na matu saw shaga ai lam rai nga ai. Tinang hkum tinang san yu nga ga: Madu nye a mara ni hpe raw dat kau ya ai hpe ngai kam sham nga ai kun? Shing nrai, ngai hkum ngai hkye la lu ai zawn galaw nga ai kun?
Hkye hkrang la ai lam hpe ra sharawng nna, dai hpe lu la na matu Karai Kasang a karum shingtau lam hpe ngai hpyi nem nga ai kun? Labau hta byin lai wa sai mabyin ni hpe lachyum shapraw lu shangun ai myit mada lam hpe ngai hta teng sha hkam sha nga ai kun, tara rap ra lam hte maren anhte a daju nga shara hpe makawp maga na matu hte kadai mung ngam kau da hkrum ai hku n hkam sha lu hkra galaw na matu ngai hpe shadut ya ai myit mada lam hpe ngai teng sha hkam sha nga ai kun?
Hpu nau ni e, Yesu Hkristu hta Karai Kasang a tsawra myit a majaw, myit daw myit hten ai lam n nga ai myit mada lam hta anhte hpe ngang grin nga ga ai (cf.Rom5:5). Myit mada lam gaw “myit wenyi a ngang kang ai hte ngang kang ai n-gang” rai nga ai.
[8]“Masha shagu hkye hkrang la hkrum na matu” (1 Tim2:4) akyu hpyi na lam Nawku hpung hpe shadut ya nna, sumsing lamu a hpung shingkang hta, hkungran la nnan Hkristu hte rau hpawng de na hpe myit mada na matu shadut ya nga ai. Ndai gaw Avila mare na San Pra ai Teresa a akyu hpyi ga rai nga ai: “Myit mada nga u, nye a wenyi e, myit mada nga u.
Dai nhtoi hpe mung, dai ahkying hpe mung, nanhte n chye myit dai. Nanhte a myit n galu ai gaw, teng man ai lam hpe kam shut shangun nna, grai kadun ai aten hpe galu ai aten de galai shai kau ya ai raitim, yawng mayawng gaw lawan ladan lai mat wa nga ai” (The Exclamations of the Soul to God, 15:3).[9]
Myit mada lam a Kanu Nu Maria gaw anhte a matu akyu hpyi htinglu ya ai hte, ndai Lusha gam ladaw hkrun lam ting hta manang tai hkan nang hkan sa nga u ga law.
Roma, San Yawhan Lateran, 2025 ning February shata praw 6 ya shani San Pawlu Miki hte shi a manang ni hpe myit dum poi galaw ai ten tsun lai wa ai.
