Daini na Ja Chyum Mungga hpe hti sum ru yu ai shaloi e, Lu sha gam ai shaloi gara hku galaw sa ra ai hpe tsun shadum ya nga ai. Karai kasang ra sharawng ai gaw, nang matsan dum garum ai amu mai kaja ai lam lama ma galaw ai hpe na a hkra lata hte galaw ai amu, pai lata hpe hkum chye shangun nga tsun shadum da nga ai.
Hparishe ni zawn masha ni mu hkra lam nmaw hkan e kyu hpyi marawn jahtau ai. Dai zawn re ai arawn alai ni hpe koi yen ra ai. Akyu hpyi ai shaloi e tinang a gawk kata de shang nna, chying hka hpe la da nhtawm, ndan n dawng ai shara e, nanhte a kawa kaw hpyi mu; ndan ndawng ai shara e mu lu ai nanhte a kawa gaw nanhte hpe htang jaw na ra ai. Shingrai tinang lusha gam ai shaloi e mung myi man hpe hkum jahten. masha ni n chye ai hku galaw ai hpe nanhte shabrai lu la na rai nga ai. Ndai lu sha gam ai ladaw hta, Karai Kasang a man hta lu sha gam lu hkra shakut sa ga law.
