Daini na Ja Chyum Mungga hpe hti sum ru yu ai shaloi e, Yesu a sape tai lu na matu shakut hkan sa ra ai lam hpe na lu na ga ai. Jawng sara langai mi tai lu na matu mung, laika tsang madang ni chye da ngut ai hpang, sara langai mi kaw nga ra ai sari sadang nga sat nga sa lam ni hpe aten la nna sharin la ra nga ai. Dai zawn sha kaning re ai magam lam ni hpe rai tim, tinang gaw kung kyang hkra tau nau sharin hka ja da ai rai yang sha, tup hkrak lit magam hpe gun hpai lu na rai nga ai.
Ya dai ni nang ngai yawng Shi madu a hpang e hkan nang mayu ai wa kadai raitim, tinang a n kaja ai lai kyang myit masin mahkra hpe shawng galai gram kau ra ai. Karai kasang a hpang hkan ai ngu ai gaw, ap nawng ai prat re hpe n mai malap kau nga ai. Dai majaw shani shagu tinang a wu dang hpai let hkawm sa ra ai. Ya lu su sahti taw nga tim, tinag a hkum hkrang wenyi hten bya mat yang hpa akyu nga na a ta. Shi madu a hpang hkan nang lu ai sape langai byin tai nga hkra anhte yawng shani shagu shakut sa nga ga law.
