Daini na Ja Chyum Mungga hpe hti sumru yu ai shaloi e, Lusha gam ai lam hpe anhte na chye la lu ga ai. Madu Yesu gaw hkungga ni mahkra hta na myit masin hkungga sak jaw ai hpe shi ra sharawng dik rai nga ai lam hpe mung chye la lu ga ai. Ndai lusha gam ap nawng kyu hpyi ai ladat gaw, awng dang dik rai nga ai. Ya ndai Madu a kabu gara shiga hta, Yawhan Baptista a sape ni hte Hparishe ni gaw, shanhte lu sha gam gam re ai lam hte Yesu a sape ni mahtang hpa majaw lu sha n gam ma ta nga san ai. Dai zawn san ai gaw, Yesu hte sape ni hpe mara tam ai lam sha rai nga ai. Chyum mungga hta tsun da ai gaw, lusha gam ai ladaw hta, tinang a ra sharawng dik ai lu sha, n kaja ai lai kyang langai ngai hpe kabai tawn kau shakut lu ai lam ni mung, tinang a mara a matu dan hkam ai lam nan re. Ndai zawn mai kaja ai lam ni hpe tinang a prat hta galaw shakut ra ai. Shingrai yang masha ni a ra kadawn ai lam ni hpe grau mu mada wa ai. Dai majaw mai kaja ai magam lam ni hpe grau mu mada nna, lusha gam ladaw hta, akyu hpyi shakut let Karai Kasang a matu aten grau lu jaw hkra shakut nga ga law.
