Daini na Ja Chyum Mungga hpe hti sum ru yu ai shaloi e, Madu a kyu hpyi ga hte kyu hpyi ai lam sharin ya nga ai. Madu Yesu gaw dai ni anhte hpe, gara hku akyu hpyi ra ai lam sharin ya ai. Madu Yesu zawn anhte gara hku akyu hpyi na ta? Shawng ningnan e, anhte hpe Karai Kasang hte matut mahkai ya ai gaw, anhte a masin salum a dingman dinghprim ai lam re. Ga si galu galang n tsun ra ai. Anhte ni n hpyi shi ai kaw na pi hpyi la mayu ai lam, shi yawng chye ai. Bai akyu hpyi ai gaw, anhte a hkum hkrang Karai Kasang hpe hpaw tsun madun dan ai.
Karai Kasang a yaw shada ai hku ap nawng ai lam mung re. Akyu hpyi ai gaw shagrit shanem ai hte Karai Kasang hpe madat ai lam mung re. Anhte shani shagu sak hkrung hkawm sa ai lam hta, Karai Kasang anhte hpe hpa baw galaw shangun mayu ai ngu ai hpe tam sagawn ai lam mung re. Bai numdaw masum hku nna, akyu hpyi ai shaloi tinang a matu ahkyak dik re lam ni hpe hpyi la na ra nga ai. Daini Madu a akyu hpyi ga hpe sharin ya ai hta na zawn, Karai Kasang hpe shakawn ai, tinang ra ai lu sha a matu, mara dat ya na matu, n kaja ai lam hta na lawt lu na lam ni hpyi ra nga ai. Ndai akyu hpyi ga ni gaw anhte hpe kawa Karai Kasang zawn byin wa na matu hte shagrit shanem let wanglu wang lang re ai myit masin hte akyu hpyi ai gaw, anhte Karai Kasang hte grau grau ni htep wa lu ai majaw yawng shakut sa ga law.
