Ya daini mungkan ntsa masha n kau mi hpe chye hkap la hkra tsun na matu yak la nga ai. Dai zawn re ai masha kaw Hparishe ni hte laika ka ai sara ni lawm nga ai. Karai Kasang galaw dan ai lamik kumla ni hpe n lu hkap la ai. Bai Madu Yesu hpe Karai a kasha re ai lam hpe mung n lu hkap la ma ai. Madu Yesu ahkaw ahkang arawng sadang gaw, tengman ai, jet ai re hpe mung, ningdang n lu hkap la ma ai. Shing rai Madu Yesu a ahkaw ahkang hpe sakse madun na matu, Madu Yesu hpe lamik kumla madun ya na matu hpyi ma ai.
Nga kaba a kan kaw masum ya tup rawng ai kaw na bai pru wa ai Yawna a lamik kumla hta lai nna, kaga lamik kumla n nga ai ngu Yesu htan ya u ai. Lamik kumla gaw Madu Yesu shi si ai kaw na bai hkrung rawt wa ai lam gaw, Lusha gam ladaw a matu kaja htap htuk dik lamik kumla nan rai nga ai. Myit malai lu ai Ninewe masha ni hte Yesu bai hkrung rawt ai lam hpe shadum ya ai rai nga ai. Shingrai lusha gam ai ladaw ngu ai gaw, anhte myit masin Karai Kasang hpang gayin wa na matu a ten re. Yesu tsun ai, myit malai kaba hte galai shai wa ai gaw, myit masin kata galai shai ai nan re. Dai majaw lusha gam ladaw hta anhte a mara hte n kaja ai lam ni a matu kup tsup ai myit malai kaba hte Karai Kasang kaw bai n htang wa ga law.
