Daini na Ja Chyum Mungga hpe hti sumru yu ai shaloi e, Hpyi mu, Tam mu, Akawk mu ngu ai mungga na la lu ga ai. Hkaw hkam shayi sha Esater gaw, Karai Kasang a makawp maga garum matsan dum ai hpe, myit kraw kata kaw na nan sharawng ai hte shagrit shanem hpyi ai majaw, madat ya ai. Anhte a prat hta mung tinang ra ai chyeju hpe wanglu wanglang hpyi ga ai. Mungdan simsa na matu lang law law hpyi chye ga ai. Anhte a makau grup yin kaw nga ai n kaja ai ni a matu, n ju n dawng ai ni a matu, n tara ai hku woi awn sa nga ai ni a matu lang law wa kyu hpyi ya ga ai. Anhte hku hkau ai ni ai machyi ai ten hkam kaja wa na matu akyu hpyi ya chye ga ai.
Kalang lang anhte hpyi ai shaloi langta n lu ai zawn hkam sha ai ten hta, n chye madat, n chye hkap la ai ten, anhte myit du ra na gaw, Karai Kasang gaw, n kaja ai hte myit ru na lam ni hta na, mai kaja tsawm htap ai hku galaw ya lu ai hpe myit dum ra ga ai. Shingrai prat hta ruyak jam jau ai, n tara ai lam ni hkrum wa yang, Karai Kasang kaw myit galu kaba ai hte la ra ai. Dai majaw jam jau hkrum wa ai ten hta, shi madu a garum ya na hpe kam sham kam hpa let myit galu ai hte a la nga ga law.
