Wa Sarabyin Francis kaw nna Laban shani na Angelus hta machyi ai masha shagu hte majan tsinyam hkrum nga ai ni a matu kyu hpyi garum na matu saw shaga dat ai rai nga ai. Wa Sarabyin Francis Rome’s na Gemelli tsirung hta tsi tsi hkam la ngut ai hpang samai wa sai hte laban shani na Shi a Angelus hpe The Holy See Press Office kawn hkyen lajang da sai hpe hti ndau ya lai wa ai hpe chye lu ai.
Wa Sarabyin kawn kam sham ai hpung masha ni hpe Wan Gam Ladaw kaw nna Pasaka ladaw de hkawm sa wa ai lam hta tinang hkum hpe san seng ai hte wenyi lam hta kalang bai nnan Hku galaw ai ten hta makam masham myit mada tsawra ai lam ni hta rawt jat galu kaba wa hkra galaw na hpe saw shaga lai wa ai.
Machyi hkrum nga ai masha law law hpe yu gawn lajang nga ai lam hpe atsawm sha myit sawn sumru yu yang dai zawn yu gawn lajang ai lam gaw Karai kasang shi nan anhte hpe gawn lajang nga ai lam rai nga ai hpe tsun lai wa ai.
Ndai zawn aten galu nna Tsi tsi hkam la nga ai laman hta ngai hpe tatut garum shingtau ai lam hte garum shingtau ai lam a lamik kumla hpe myit dum lu ai, bai nna mung tsawra myit hte yu gawn lajang ya ai Doctors ni hte Health Workers ni hpe myit kraw na myit masin tup hte chyejum dum ai lam hpe Wa Sarabyin tsun lai wa ai.
Dai gaw “matsan dum lama ai a Mau hpa lam” (miracle of tenderness) rai nga ai dai zawn re lam ni nga yang she anhte ni hta byin nga ai mayak ni hpe shapri shanyem ya lu nga ai, bai nna dai gaw anhte hta machyi hkrum ai nsin a matu nhtoi kachyi mi sha pyi raitim jaw ya nga ai hpe anhte ni lu hkam la lu nga ai hpe tsun lai wa ai.
Wa Sarabyin kawn chyeju dum ai hte Spiritual annual Exercise hta mung Rome kaw spiritual officials Curia ni hte rau shang lawm mayu ai lam hpe kahtap nna tsun da nga ai hpe chye lu ai.
Wa Sarabyin kawn kru ya laban shani ni hta galaw lai wa ai World of Volunteering na Jubali hpe mung myit dum nga ai lam tsun lai wa ai. Anhte a shinggyim wuhpawng hta nga manga arai mahkra gaw anhte a tinggyeng lu lawm lam hte sut masa ladat hku nna masat da ai hku anhte ni hkawm sa nga ai mayam ni she rai taw nga ai, dai majaw ndai “Volunteer” galaw ai gaw anhte ni sa sana galaw ai hte myit mada ai lam a kumla mung rai nga ai, hpa majaw nga yang ndai lam gaw anhte ni a gam jaw ai lam, shada myit hkrum mangrum ai hte kaja wa ra kadawn ai ni hpe karum ya nga ai madung sak se kumla mung rai nga ai hpe tsun lai wa ai.
Ya na zawn tinang a gaja ai masin salum hte rau tinang a ginra hkan nga ai wuhpung wuhpawng hta ap nawng nga ai ni yawng hpe chyeju dum ai hte, na a tsawra ai myit hte yu gawn lajang ai lam ni gaw Masha a matu myit mada ai lam (hope) rai nga ai hpe bai shabyin ai hta karum ya lu ai lam re hpe tsun lai wa ai.
Hpang Jahtum hku nna Wa Sarabyin Francis kawn “Ukraine, Palestine, Israel, Lebanon, Myanmar, Sudan and Democratic Republic of Congo” ni a matu ngwi pyaw simsa ai chyeju hkam la lu na matu kyu hpyi ya lai wa ai.
Bai nna mung gade nna shi yang Siriya hta byin lai wa sai majan hpe myit dum let wuhpung wuhpawng a myu sha lamyan hte nawku hpung yawng, grau nna mung masha ni hpe atsawm hkungga lara na matu tsun lai wa ai.
