LUSHA GAM LADAW LABAN (II), C SHANING
( 2 nd Sunday of Lent, Cycle C )
Yesu Hkristu gaw Karai Kasang a shagrit shanem ai lam, shinggyim masha ni hpe shagrau sha-a ai lam rai nga ai – Phillips Brooks
Pru Mat Wa Ai Laika (34:28-35) hta Mawshe a htoi kabrim ai myi man a lam hpe tsun da nga ai. Mawshe gaw Karai Kasang hte rau nhtoi mali shi ya, mali shi na tup lu sha n sha ai sha koi gam ngut ai hpang, Sina bum kaw nna yu wa ai shaloi, shi a myi man gaw nhtoi hte htoi tu nga ai. shaloi e Arun hte Israela kashu kasha ni gaw shi hpang de sit sa na matu hkrit lai wa ai hpe mu lu nga ai. Dai majaw, Mawshe gaw amyu masha ni hte ga shaga nga yang, shi a myiman hpe man magap hte magap da lai wa ai rai nga ai.
Mawshe gaw Sina bum ntsa e Karai Kasang a hpung shingkang shadan dan ai hpe mu ai shaloi, shi gaw hpung shingkang kaw nna hpung shingkang de dai hkrang nsam hku galai shai mat wa ai hpe hkam sha lu nga ai. Mawshe gaw shi asak hkrung nga ai jahtum ten du hkra shi a htoi tu ai myi man a masat dingsat nkau mi hpe gun hpai lai wa ai nga nna tsun da nga ai. shi a myi gaw Madu a hpung shingkang hpe mu lu ai majaw nhtoi yawm mat ai lam n nga ai sha, Karai Kasang a hpung shingkang hte htoi tu ai shi a myi man hta mung, nhtoi yawm mat ai lam n nga ai hpe mu lu ai.
Dai ni na Kabu Gara Shiga hta, Yesu a Hpraw nsam galai shai ai lam hpe na la lu saga ai. Yesu hkristu akyu hpyi nga ai shaloi shi a hkum hkrang hpraw nsam galai shai mat wa ai rai nga ai. shi gaw Akyu hpyi na matu shagrit shanem ai zawn, shagrau sha-a hkrum lai wa ai. Shi a prat hta akyu hpyi ai lam gaw ahkyak ai shara langai hta nga lai wa ai. Madu hkristu chyahkring hkring akyu hpyi lai wa ai: Shi kashin kamun n hkam shi yang akyu hpyi ai, bai Shi gunglau ai lam hpe n hkrum shi yang akyu hpyi lai wa ai; Shi a hkum hkrang hpraw nsam galai shai ai lam hte tsin-yam tsindam n hkrum shi yang akyu hpyi ai sape ni hpe garai n lata shi yang mung akyu hpyi lam galaw lai wa ai. Shi gaw jahkring hkring, shi hkrai bum ntsa de lung nna shana tup kyu hpyi let hkring sa la ai hpe mu lu ai.
Anhte mung dai hte maren, sumsing lamu na Jinghku wa hte aten shama na matu, anhte dinghkrai mung shani, bat, shata mi ndai zawn aten laman ni hta hkring sa la na lam galaw ra nga ai. Anhte a bungli law ai majaw akyu n hpyi ai lam n galaw ai dai gaw n byin ging ai. Yesu gaw shi hkum nan simsa ai shara sa ai sha n-ga, bum de mung lung lai wa ai. Akyu hpyi ai gaw n-gup hte sha tsun ai hku n byin ging ai, anhte a myit masin hpe hpaw ai lam tai ra ai. dai gaw myit galai shai ai lam n re ai sha, shang lawm ai lam hku mahtang rai ra ai. Dai hta anhte a myit masin tup hte shang lawm ra ai; anhte a myit masin hpe Karai Kasang hpang de mahkri shawn ai lam hta gaw sharawt la ra ai. Dai ni, anhte a Madu a hkrang hpraw nsam galai shai ai aten hta sumsing lamu na shang lawm ai lam masum hpe myit sumru yu lu na matu tsun dan mayu ai. bai dai Madu a hpung shingkang hta shang lawm nga ga.
Yesu akyu hpyi nga ai ten, Shi a myi man nsam gaw galai shai mat wa ai. San Mahte gaw Shi a myi man gaw jan zawn htoi tu ai ngu tsun lai wa ai. Shi gaw Dinghpring ai Jan hte mungkan a Nhtoi rai nga ai majaw dai zawn nhtoi hte htoi tu ai Shi a myi man hta nga nga ai. Mawshe gaw Sina bum ntsa e karai kasang hte hkrum ngut ai hpang bum kaw nna yu wa ai shaloi, shi a myi man mung, htoi tu nga ai. Raitimung, shi a myi man na nhtoi gaw, shata zawn, hkoi la da ai nhtoi rai nga ai. Yesu a myi man gaw jan zawn htoi tu nna Shi a shangai wa ai tsawm htap lam hte hpung shingkang gaw sumwi kaw na akajawng sha pru wa ai zawn rai nga ai.
Yesu a palawng mung, myi hprap zawn htoi tu wa ai. Yesu a hkum hkrang ting mung nhtoi htoi tu wa nna, Shi a hpun palawng ni pyi myi hprap zawn htoi tu wa ai. Mawshe a myi man hta na nhtoi gaw n-gun kya ai majaw, n-gup magap kaji hte makoi da lu ai (Pru 34:33), raitim Yesu a hkum hkrang na nhtoi gaw grai htoi tu ai majaw, myi makrim na daram Shi a hpun palawng ni gaw htoi tu hpang wa ai. Yesu a hpung shingkang gaw Karai Kasang a Kasha shingtai a hpung shingkang re ai zawn, laklai ai hpung shingkang mung rai nga ai. Shi hkum na hpaw nsam galai shai ai shaloi, Shi a Karai Kasang hkrang gaw Shi a shinggyim hkrang masa hpe malawng kau shangun nga ai.
Karai Kasang hte kanawn mazum ai lam gaw anhte hpe galai shai shangun nna hpung shingkang hpring shangun nga ai. Anhte a myit masin hta Hkristu hpe gun hpai nga ai hte maren, Shi gaw anhte a myit masin kata de grau grau shang wa nna, hpang jahtum anhte hpe hpung shingkang kaw nna hpung shingkang de galai shai wa shangun na re. Maclaren kawn, “Anhte a myit masin hta nga ai Hkristu gaw, myi man hte prat hta nga ai Hkristu rai wa na re.” nga nna tsun lai wa ai. Anhte Hkristu hte matut manoi nga yang, shi hte bung wa ai hte, anhte a myiman nsam ni mung galai shai wa na re. Madu a hpung shingkang hpe chyamna hta bai dan dawng ai zawn mu lu ai zawn, hpung shingkang langai kaw nna kaga langai de, shi a hkrang sumla langai sha hku tai wa na ga ai (2 Kor 3:18).”)
Yesu a hkum hkrang galai shai wa ai shaloi, sumsing lamu na manam lahkawng ngu na- Mawshe hte Elia gaw Shi hte hkrum shaga lai wa ai. Ndai manam lahkawng yan gaw bum ntsa e Karai Kasang hte hkrum lai wa ai ni mung rai nga ai. Mawshe gaw Karai Kasang kaw na Tara kanu lam Shi hpe Sina Bum kaw lu la lai wa ai, myihtoi Elia gaw Horeb Bum hta Karai Kasang hte hkrum shaga lai wa ai. Ya gaw, htunglai hku nga yang, Tabora bum ntsa e tsap let, Yesu hte shi a pru mat wa na lam hpe tsun da nga ai.
Yesu gaw ndai mungkan ga de du sa ai gaw anhte hpe sharin achyin ya na, lam madun ya na, shamai shatsai ya na matu sha n rai, Udang ntsa hta si hkam na matu du sa wa ai mung rai nga ai. Aten ladaw ni htum wa ai hte maren, Udang gaw Shi a prat hta grau nna dan dawng wa ai hte Shi a wenyi ntsa e grai li ai hku hkam sha ra nga ai. Shi gaw Udang lam hpe hkrit tsang nga ai, raitim, dai lam kaw na Shi n koiyen mat ai. Shi a hkum hkrang hpe Udang lam kaw nna koi yen mayu ai shinggyim masha myit nga ai, rai tim Shi a myit ra sharawng ai lam hpe n galai shai kau ai. Shi gaw n-gun atsam hte shalan shabran ai lam ra kadawn lai wa ai, dai hpe kalang mi sumsing lamu na lamu kasa kaw na lu la lai wa ai, ya gaw Yerusalem mare hta Shi shadik shatup ra ai Shi a si hkam na lam hpe sumsing lamu na manam lahkawng hte hkrum shaga ai kaw na na la lu ai lam tsun da nga ai.
Lai wa sai aten na ndai myi htoi kaba lahkawng gaw, Yesu zawn nhtoi mali shi ya, shana mali shi ya tup lusha gam lai wa ai; shan lahkawng gaw shan si ai lam hte seng nna mau hpa lam langai ngai nga ai hpe mu lu ai. Mawshe gaw Nebo bum ntsa e shi hkrai sha si mat nna, shi a lup hpe daini du hkra kadai mung n chye lu ai, myihtoi Elia hpe mung nbung laru kaba hte sumsing lamu de woi shalung la hkrum lai wa ai. Si hkrung si htan kaw na lawt lu ai zawn rai nga ai ndai myihtoi kaba yan gaw, ya Yesu a man e tsap nna, Shi a si hkrung si htan hte seng nna tsun bawngban nga ai. Mawshe gaw Israela amyu masha ni hpe Egutu mung na mayam prat kaw nna nam mali hte Ga Sadi Tawn Da Ai Mungdan de woi wa ai rai nga ai (exodus), ya gaw Elia hte rau sa nna, Yesu a si hkam ai lam hku nna lawt lu na lam re hpe tsun bawngban na matu sa wa ai (exodus). Moi na ndai myihtoi kaba lahkawng gaw, Udang lam de hkawm taw nga ai yesu hpe shalan shabran ya na matu sha nrai, shi gaw Tara hte Myihtoi ni a yaw shada lam hte hpring tsup ai masha rai nga ai hpe sakse hkam na matu mung du sa ai yan rai nga ai. Shan a shawng hta, Yesu gaw lai wa sai aten yawng a lachyum rai nga ai hte Karai Kasang a hpaw shadan dan ai shingran lam ni a janmau rai nga ai hpe ndau shabra ya lai wa ai.
Shi a kashin kamun hkam ai gaw Shi a Gunglau hkrum ai lam hte Shawa Prat hpe hpaw hpang wa ai zawn, Yesu a prat hta ahkyak ai daw langai mi – Shi a tsin-yam tsindam, si hkam ai hte bai hkrung rawt ai lam hpe hpaw hpang wa ai lam rai nga ai. Ndai aten lahkawng yan hta, Yesu gaw Karai Kasang grai ra sharawng ai Karai Kasang a tsawra ai Kasha re ngu nna ndau shabra hkrum sai. Sumsing lamu na nsen gaw, Yesu gaw Karai Kasang a tsawra ai Kasha re ai hpe kalang bai madi madun ya lai wa ai, anhte gaw, ya, Shi a ga madat mara ra nga ai.
Sumsing lamu na nsen na ai hpang Mawshe hte Elia mat mat wa nna, Yesu hpe chyu sha mu mada ma ai. Myihtoi kaba ni hte kasa kaba ni yawng gaw lani mi hta teng sha si mat mat na rai tim, Yesu chyu sha htani htana grin nga na re. “Shi gaw mani, dai ni mung, htani htana mung maren sha rai nga ai (Heb 13:8).” Mawshe hte shi a Tara gaw kaba nga ai; Elia hte shi a myihtoi ga mung, Israela amyu dingsa a matu kaba nga ai, rai tim anhte Israela myu sha nnan ni a matu gaw, dai masha ni hpe n ra ga ai. Yesu a ga hpe madat ai hte ram nga ai. Karai Kasang gaw Shi hpe Kasha hku hkap la sai hte maren, anhte yawng hpe mung Yesu hta Shi a kasha ni hku nna hkap la nga ai. Yesu hpe anhte a Hkyela Madu hku hkap la nna, Shi a lam woi ai, shamai shatsai ya ai, up hkang ai hte shachyoi shapra ai lam hpe hkam la na matu tinang hkum hpe madat mara hte ap da ra nga ai.
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw lusha gam ladaw hta. lahkawng. ngu na lanban rai nga ai hti ang ai ja chyum mungga ni gaw chyum mungga daw langai ..npawt nph laika 15: 5-12, 17-18 chyum mungga daw lahkawng phi 3: 17- 4:1 kabu gara shiga Lk 9:28-36
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.\
