( Making the Most of Our Time )
Ehpesu ni hpang de shagun ai Laika 5:15-16 hta Kasa Pawlu anhte hpe sadi jaw ai, “Dai re ai majaw, nanhte kaning rai kawm nga myit dai gaw, azin ayang yu nga mu: hpaji n rawng ai ni zawn n rai, hpaji rawng ai ni zawn hkawm nga mu: ya na nhtoi ladaw ni gaw n shawp nga ai majaw, dai ahkying aten hpe lata mari la mu. ”
Dinghta ga na anhte a aten gaw, ahkyak dik rai nga ai. Ndai Mungkan a lam ni hpe lachyum n pru, akyu n rawng ai hku hkan shachyut let shama kau ai ten ni hpe galoi mung bai lu la sana n rai.
Karai Kasang a Yaw shada ai lam rai nga ai- tsawra ai hpe hkam la nna kaga masha ni hpe bai gam garan ai lam ni hta jan nna, jai lang ai aten hpe galoi mung bai n lu la sana. Anhte lu da ai aten ni hpe, shut hpyit mara ni hte mungkan a tang pyaw lam ni hta hkan byau nna, myit pu ba, lit li hkam aten shama kau na gaw, lahpawt lama rai nga ai.
Anhte a dinghta prat na aten malawng hpe akyu rawng hkra jai lang mayu ai rai yang, Karai Kasang hte hkrum kanawn ai lam hpe ka-ang daju da ra ga ai. Dai gaw manu daw dan n lu ai htani htana a sutgan rai nga ai.
Ndai lam hte seng nna Kasa Yaku a shagun laika 4:13-15 hta tsun ai: “ Bai lam mi gaw, Dai ni, shing n rai, hpawt ni e, ndai mare de anhte sa wa nhtawm, dai yang e laning mi hkring nga nna, hpaga ga na hte amyat lu sha na gaw ai, nga nna tsun nga ai ni e, sa marit: hpawt ni e pyi hpa byin na ra ai gaw nanhte n chye nga mit dai ; nanhte a asak gaw hpa rai nga malit ta? Chyahkring jahkra sha dan pru nna, hkoi mat ai salu rai nga malit dai, dai rai nna, dai Madu hkraw nga a yang gaw, anhte mung a hkrung nga lu na hte, ndai mung, wora mung galaw lu na ga ai, nga nna nanhte mai tsun na myit dai. ”
Anhte a ahkying aten hpe gara hku jai lang ga ai hpe dinglik yu ai gaw, anhte a salum, myit masin a shamu shamawt ai hpe maram dinglik yu ai lam langai mi mung rai nga ai. Anhte a ahkying aten mahkra hpe ndai mungkan lam ni hpe sha myit nna hkan galaw nga ga ai rai yang gaw, Karai Kasang a yaw shada lam ni hpe anhte rai n mu mada lu shi ai rai nga ai.
Anhte a prat hpe shangang ya lu ai Wenyi hta kabu gara ai lam hpe lu la na matu Karai Wa a myiman hpe n tam ai sha, mungkan pyaw hpa lam ni hpe chyu sha hkan tam ga ai rai yang, anhte a prat hpe anhte a Madu Hkawhkam wa kaw rai n ap nawng shi ai hpe mu mada lu ga ai.
Ahkying aten ngu ai hpe anhte ra ai hku kam ai hku jai lang mai nga ai. Ya rai tim, Karai Kasang a mungga sharin ya ai hte maren Karai Wa a yaw shada ai lam ni hpe hkan shadik na matu myit hkut daw dan mai nga ai. Ya jang, manu dan la ai aten hpe lahpawt lama n di ai sha, htani htana grin nga lu ai akyu ni hpe tam na matu daw dan mai nga ai.
Shakawn Kungdawn Laika 90:12 hta, “Anhte gaw myit hpaji lu la hkra, Anhte a nhtoi chye hti lu na, sharin ya mi” nga nna tsun da ai.
Karai Wa gaw anhte a ahkying aten nhtoi ni hpe myitsu, hpaji rawng ai hku asung jashawn jai lang chye hkra sharin ya mayu nga ai. Shi Kawa hte rau hkrum kanawn hkawm sa chye hkra anhte hpe hpaji rawng ai salum hpe jaw mayu ai. Lachyum rawng, akyu pru ai sak hkrung lam hpe woi hkawm na matu Wa Karai gaw na a salum kata shanu nga nna nang hte rau arai nga ai. Dai majaw, na a salum chyinghka hpe hpaw nna, Karai Kasang a wenyi ngu ai na a Sara Kaba hpe hkap tau la u; Shi myit ra sharawng ai hte maren sak hkrung u.
Daini, na a aten hpe arang bang ai hte maren, simsa, kabu gara, ban dung de du wa u ga-
Myit Sumru akyu hpyi ga:
1. Shawng ningnan, Ehpesu ni hpang de shagun ai Laika 5:15-16 hta rawng ai mungga hpe sumru yu ga;
“ Dai re ai majaw, nanhte kaning rai hkawm nga myit dai gaw, azin ayang yu nga mu: hpaji n rawng ai ni zawn n rai, hpaji rawng ai ni zawn hkawm nga mu: ya na nhtoi ladaw ni gaw n shawp nga ai majaw, dai ahkying aten hpe lata mari la mu.”
2. Na a ahkying aten ni hpe lachyum n pru ai hku shama kau sai ten ni hpe dum chye lu hkra Chyoi Pra ai Wenyi kaw garum hpyi u. Raitim, Karai Kasang gaw na a pyaw hpa lam ni yawng hpe la kau ya ai wa n re, ngu ai hpe dum ra ai. Shi gaw shangwi shapyaw ai lam ni, manaw manang ni, party poi ni hpe ninghkap ai Karai Kasang n re, Shi gaw kabu pyaw awlaw chye ai Karai Kasang rai nga ai.
Sumsing Lamu na anhte Kawa a tsawra ai salum hpe makam masham hpung masa hte n mai shut, gayau kau ai. Kam u! Na a prat galai shai hkra shi nang hpe woi awn ai gaw- kabu pyaw dik, akyu pru nna myit dik ai sak hkrung lam mahtai de teng sha du na ra ai.
Kasa Yaku anhte hpe shadum ai (4:13-15):
“Bai lam mi gaw, Dai ni, shing n rai, hpawt ni e, ndai mare de anhte sa wa nhtawm, dai yang e laning mi hkring nga nna, hpaga ga na hte amyat lu sha na gaw ai, nga nna tsun nga ai ni e, sa marit: hpawt ni e pyi hpa byin na ra ai gaw nanhte n chye nga mit dai ; nanhte a asak gaw hpa rai nga malit ta? chyahkring jahkra sha dan pru nna, hkoi mat ai salu rai nga malit dai, dai rai nna, Dai Madu hkraw nga a yang gaw, anhte mung a hkrung nga lu na hte, ndai mung, wora mung galaw lu na ga ai, nga nna nanhte mai tsun na myit dai.”
3. Daini na aten hpe akyu rawng ai hku jai lang lu hkra Karai Wa kaw akyu hpyi u. Na a shawng lam hta Shi madun matsun ai hpe hkan nang lu hkra garum ya na matu hpyi u.
Yawhan 16:7 hta Madu Yesu tsun ai:
“ Ning nga ti mung, teng man ai lam she ngai nanhte hpe tsun nngai; ngai wa ai gaw nanhte a akyu matu rai nga ai: kaning rai nme law, ngai n wa yang gaw dai shalan shabran ai wa nanhte kaw du sa na n rai: ngai wa jang chyawm gaw, ngai shi hpe nanhte hpang de shangun dat na we ai. ”
Na a ahkying aten a matu kaja dik ai masing Karai Wa hta nga ai hpe nanhte kam mai ai.
Mt 6:8 hta Yesu tsun ai.
“Nanhte garai n hpyi lu yang pyi, nanhte ra ai hku hpe, nanhte a Kawa, Karai Kasang chye ya nga ai majaw, shanhte hte hkum bung nga myit”
Na a ra kaji, ra kaba mahkra hpe Shi chye ya ai, hkum tsup ai hku jaw ya na re. Dai hpe na asak hte rang nna kam ra ai. Na magam bungli, dinghku, masa lam mahkra grau kaja wa na ra ai. Na a aten, bungli, ja gumhpaw kanawn mazum lam mahkra shi a chyeju hte hpring kabrat wa u ga, kam sham myit kaba hte ap nawg da u.
