Daini na Ja Chyum Mungga hpe hti sum ru yu ai shaloi e, Yesu Hkristu shangai wa ai lam hpe na lu ga ai. Nawku hpung kaw na daini gaw San Yawsep a poi n’htoi hpe galaw ai. San Yawsep gaw, hpa lam hta raitim, ta tut hkan galaw ai wa re. Dai majaw chyum laika kaw shi ga sha tsun da ai shara mi pi n nga ai. San Yawsep gaw sumru dinglik chye ai dingman dinghpring ai wa mung re. Shagrit shanem ai. Shi a prat hta Karai Kasang a ra sharawng ai hpe sha hkan tam galaw sa ai wa re. Shi yup ai ten hta raitim pi, Karai Kasang a ga madat ai wa re. Shi gaw Ma Yesu hte Maria hpe tsawra myit hte yu gawn lajang ya ai.
Shannu ra ai hpe madi shadaw ya ai. Shan hpe shim lum hkra woi nga ai. San Yawsep a ta tut galaw ya ai matsan dum lama chye ai lam ni gaw, anhte yawng a matu, kasi la hpa nan re. Dai lam ni gaw, Karai Kasang a hkye la ai labau hta, Yawsep a lak san shara langai mi nan rai nga ai. Dai mabyin gaw anhte yawng kasi la hpa nan rai mat sai. Ya anhte hkristan ni yawng gaw, ndai mungkan hta Madu Yesu a simsa lam hte hkye hkrang la ai lam a garum shang lawm ai ni nan rai nga ai. Kaji htum ai wa hpe dawjau ai gaw, Madu Yesu hpe nan daw jau ai lam nan re. Ap nawng ai amu shagu gaw, manu dan nga ai. Dai majaw, anhte galaw ang ai lam shagu hta na, magam lit ni hpe kangka ai hte ap nawng daw jau nga ga law.
