Daini na Ja Chyum Mungga hpe hti sum ru yu ai shaloi e, Jep ai hkan sa ra ai tara hpe shatup shadik na matu Yesu du sa wa ai lam na la lu na ga ai. Rip kawp tara ngu ai gaw, shinggyim masha langai mi a lu la grin ai ahkaw ahkang hpe makawp maga ya ai, bai kaga masha wa a ntsa tawn da ra ai lit magam ni hpe hkan sa shatup ai mung rai nga ai. Masha yawng a mai kaja na akyu a matu gyin da ai rit kawp tara nan re. Dai majaw dum nta, jawng kata, rung gawk hte mungdan kata hta rit kawp tara ni tawn da ai gaw, shinggyim masha ni yawng ngwi pyaw sim sa ai hte rau myit hkrum nga na matu rai nga ai.
Dai majaw anhte gaw, yawng a matu mai kaja na hte tara rap ra na matu galaw sa na ra nga ga ai. Raitim Karai Kasang gaw, anhte hpe dai hta grau nna, mai kaja ai lam lagaw na matu ra sharawng nga ai. Karai Kasang a tara upadi ni gaw rap ra ai hte tsawra myit ni hpe madung da ai nan re. Ga shaka dingsa na tara U padi hpe jahkum shazup ai Madu Yesu hkum nan sharin ya ai tara nan re. Dai zawn sha hkristan ni mung tinang nga ai mungdan masha, Karai Kasang hte seng ai mungdan masha ngu nna, hpan lahkawng hkam da ra nga ga ai. Dai majaw anhte aprat hta e, mungdan a tara hte Karai Kasang a tara u padi ni hpe hkan sa na lit kaba nga ga ai hpe n mai malap kau nga ai.
