26 March 26, 2025 ya jahpawt 9:00am ten, Myitkyina Saradaw Sasana, San Columban Cathedral Jawng wang, Wa Jau ni a htap masum nta zuphpawng Gawk Nu hta Myanmar Hkristan Hpung (Anglican) Myitkyina Bishop ginwang Up Bishop Kumgyi John Zau Li woi awn let Jinghpaw mung ting hta lit la woi awn nga ai Anglican Nawku Hpung magam gun Sara/ Sara Kaba ni Myitkyina Kahtawlik Nawku hpung hte hkrum shaga ai lam galaw lai wa sai.
Myanmar Mung Hkristan Hpung Anglican, Myitkyina Bishop ginwang Anglican Nawku Hpung ni hpe Myitkyin Saradaw Sasana hta magam gun hpai nga ai Wa Jau ni kaw kabu gara hkap tau hkalum let hkrum zup ai lam hpe galaw lai wa sai.
Ndai hkrum zup hpawng hta Myitkyina Saradaw Sasana Lit hkam Sagurem wa, Wa Saradaw John Mungngawn La Sam sum tsan hkawm nga ai majaw nshanglawm lu ai raitim, Myitkyina Saradaw Sasana Vicar General Wa Jau Dr. Peter Hka Awng Tu hte Wa Jau Bosco Nlam Hkun Seng (Chancellor Myitkina ) ni woi let hkrum zup lai wa sai rai nga ai.
Ya na zawn Myanmar Mung Hkristan Hpung Anglican, Myitkyina Bishop ginwang Anglican Nawku Hpung ni Sa du hkrum zup ai lam a yaw shada ai lam gaw, Myitkyina Saradaw Sasana a woi awn nga ai Sasana lam yan ni hpe chye mayu ai majaw sa hkrum ai re lam chye lu ai.
Dai majaw, Myitkyina Saradaw Sasana a Vicar General Wa Jau Dr. Peter Hka Awng Tu, Wa Jau Bosco Nlam Hkun Seng hte Commisions ni kaw nna Myitkyina Saradaw Sasana kata galaw nga ai masing masa lam, Hkrang (Structure) ni hpe tsun dan, let san htai ai lamang ni hpe mung galaw lai wa sai.
Myitkyina Bishop ginwang Anglican Nawku Hpung ni kaw nna mung Anglican a woi awn nga ai Hkrang (Structure) hte Sasana magam bungli ni hpe tsun sang lang dan rai, Myitkyina Bishop ginwang up Bishop Kumgyi John Zau Li hte rau magam gun ni marai (40) jan hte hkrum zup lai wa sai.
