Sam Mung Loihkam Mare Kaw Galaw Ai Saradaw Ginwang Ting Hte Seng Ai Myit Mada Lam Jubali Hte Jau Shatai Poi
Lashio Saradaw Ginwang ting hte seng ai Myit Mada Ai Lam Jubali Poi hpe ( 24 March 2025 ) ya shani Loihkam, Christ The King Nawku jawng wang hta galaw lai wa ai hte 25 March 2025 shani gaw Deacon Noel La Si Htang Bawm hte Deacon Peter L . Q Gyung Ze yan hpe htani htana jau aya hkam ya ai jau shatai poi hpe galaw lai wa ai.
Jubilee poi hte jau shatai poi hta Yangon Saradaw kaba Cardinal Charles Bo sa du shang lawm nna Jubilee Missa Hkungg hpe woi awn nawng jau ya ai hte jau ningnan yan hpe jau aya hkam ya ai. Cardinal Charles Bo gaw gasat gala majan a majaw hpyen koi yen hprawng hkawm ra ai Lashio sasana hta magam gun nga ai ginwang up Saradaw hte jau ni, mama ni, nawku hpung masha ni hpe sa du kawan n’gun jaw let Jubilee poi hta sa du shang lawm ai mung rai nga ai. Loihkam jau ginwang gaw Cardinal Charles Bo jau prat naw re ai ten ( 9 ) ning tup magam gun lai wa ai shara, shi a salum re nga nna Cardinal tsun ai. Dai aten hta Lashio kaw nna Loihkam de lagaw lam hte ( 5 ) ya daram hkawm nna sasana galaw ra ai lam mung chye lu ai.
Lashio Muklum hte Saradaw ginwang kata na mare buga shara ni law law gaw lai wa sai shaning kaw nna gasat gala majan byin ai majaw dumbri dumbra rai shim lum dum ai shara de hpyen koi yen hprawng hkawm ra ai Saradaw ginwang rai nga ai. Lashio Saradaw ginwang up Wa Saradaw Lucus Dau Ze hkum nan hte Lashio Muklum hta magam gun nga ai Wa Jau ni, Mama ni hte mare buga masha ni law law lai wa sai shaning July shata 16 ya shani kaw nna Loihkam hte kaga shara ni de hpyen koi yen hprawng hkawm taw ai.
Loihkam mare gaw Lashio kaw nna mawdaw hte sa ai rai yang hkying hkum mi jan hte du ai shara raitim hpyen yen hprawng wa ai ten hta lam kaw lahkawng na yup nna she Loihkam de du ai lam Wa Saradaw Lucas Dau Ze tsun dan ai kaw na chye lu ai. Wa jau, Mama ni hte hpung masha n kau mi gaw Mongyai na Hpu nau Bugda hpung gyi jawng hta shata mi jan sa shingbyi hpyen yen hkawm ai ni lawm ai zawn, n kau mi gaw kadai mung kadai shimlum dum ai shara, machyu shingbyin na manu dum ai shara ni de hprawng shingbyi hkawm mat ai, n kau mi gaw Taungyi Saradaw ginwang kata na Laikha mare hkan mung ya aten du hkra hpyen koi yen shingbyi nga ai hpe mu lu ai.
Saradaw ginwang shara law law hta majan byin ai majaw hpung masha ni hpyen yen hkawm ra ai, yak hkak jam jau, tsin yam tsin dam lam ni law law hkrum taw ai, hkawm wa hkawm sa lam yak hkak ai, lam hkan gate masha jep ai, arung rai jep ai gate ni law law hpe lai di ra ai majaw hpung masha ni law dik ( 2000 ) daram sha sa du lu na re ngu htang da ai raitim Myit Mada Ai Lam Jubilee Missa Hkungga hte Jau shatai poi hta hpung masha ni marai ( 5000 ) jan daram sa du shang lawm lai wa ai. Sam Mung Dingdung daw rai nga ai Lashio Saradaw ginwang hta gaw Amyu sha hpan hkum ai shara, ga hpan hkum ai shara rai nga ai hte lak nak lang ai hpyen hpung mung hkum ai shara rai nga ai.
Myit Mada Lam Jubilee Missa hta sa du lawm ai hpung masha ni yawng Jubilee a hpring tsup ai Induensia chyeju hpe gingdan ai hte hkam la lu na matu Wa Saradaw ni hte Wa Jau ni kaw nna lana mi hte lani mi tup aten jaw nna Mara Raw ya ai hpang she Jubilee Missa Nawng ya ai.
Jubilee Missa hta Cardinal Charles Bo tsun ai Jubilee mungga gaw;
Chyoi Pra ai 2025 Ning Jubali Shawng nnan na Nawku Hpung a Jubali hpe Wa Sarabyin Boniface VI, 1300 Ning hta galaw hpang sai. Dai Labau Hkringhtawng hpe hkan nna, Wa Sarabyin Francis mung, 2025 Ning hpe Chyoi Pra ai Jubali Shaning ngu nna masat ya sai. Shi hkumnan mung, San Petru Nawku Htingnu a chyinghka hpe December 24 ya shana hpaw da ya sai. 2026 Ning January Shata (6) Ya shani bai pat da na rai nga ai.
Daining na Jubali a Lashum Ga-baw gaw “Myit Mada Shara” rai nga ai. Roma mare de masha wan (35) daram shang na re ngu nna sawn da ma ai.
Mungkan ting hta nga ai Saradawni a Nawku jawng/htingnu ni a chyinghka ni hpe mung hpaw da ya na matu, Wa Sarabyin matsun ya ai.
Dai hpaw da sai nawku jawng chyinghka ni hku nna shang ai hpung masha shagu, Hpring tsup ai Indugensia chyeju hpe hkam la lu nga ai. Indugensia chyeju ngu ai gaw,
- anhte galaw hkrup kau sai shut hpyit mara kaba ni hpe Jau ni kaw sa nna mara ni hpe raw kau ya ai hpe hkam la ga ai.
- Karai Kasang a matsan dum lama ai a marang e, dai mara ni hpe ngarai dan kaw na lawt lu saga ai.
- Rai tim, dai mara kaba ni a apu asi ni rai nga ai htum mat lu ai ari dam ni naw nga nga ai.
- Dai htum mat lu ai ari dam ni hpe shaprai kau, raw kau ya ai hpe Indugensia ngu nna shamying ai.
Jubali Chyinghka gaw Madu Yesu a Salum chyinghkaa kumla rai nga ai. Dai chyinghka hpe galoi mung hpaw da ya nga ai. Wa Karai Kasang hpang de shinggyim masha ni bai nhtang shang wa lu hkra hpaw da ya ai, anhte a Hkye La Madu Yesu a kumla rai nga ai. Madu Yesu tsun ai, “Ngai gaw sagu ni shang ai chyinghka rai nga nngai”.
Dai chyeju ni hpe hkam la lu na matu, anhte shada da, grau nna, tinang a hpyen wa hte htingram ra ga ai. Karai Kasang a matsan dum lama ai gaw, gyit da ai hpe raw kau ya lu ai; shada nju ndawng ai, matai htang ai ngu ai shakum ni hpe run kabai kau ya lu ai.
Rai tim, anhte malawng maga gaw, dai chyinghka hku n shang gwi ai;hpa majaw nga yang, tinang hkum hpe bai san jep sagawn shangun ai majaw, yak dum ma ai; shada ga-li ga-law, n ru n ra re ai lam ni, shada ningmu n bung hkat ai lam ni hpe tawn kau da ra nga ai; dai ni hpe lu tawn kau da jang gaw, Jubali chyinghka kata de shang wa nna Madu Hkristu hte ahpum lashum hkrum lu ga ai.
Ndai Jubali Shaning hta, Madu Yesu gaw naw hpaw da ya ai chyeju chyinghka rai nga ai. Shinggyim masha yawng hpe, dai chyinghka hku shang wa na matu, Wa Karai ala dingda nga ai, grau nna, majan a majaw, malu masha n grung ai majaw, kraw si hkrum, jamjau nga ai ma kaji ni, asak kaba mat nna tinang hkrai kau da hkrum ai gumgai dingla ni, bungli n lu nna tam shakut hkawm nga ai ni, tinang a makam masham a majawzingri zingrat hkrum nga ai ni, hkyuk htawng hkan sharen da hkrum ai ni
yawng hpe Wa Karai ala nga ai. Wa Sarabyin gaw, 2024 Ning December 26 Ya shani, Roma mare hta kaba dik rai nga Ribibbia htawng de sa nna Jubali chyinghka hpe sa hpaw da ya sai. Jubali a lashum ga-gaw gaw “Myit Mada ai Lam” ngu ai re majaw, anhte a shawng lam de mai kaja ai lam ni hpe myit mada ga. Myit mada ai lam nga yang, magrau grang ai, lit la chye ai hte matsan dum chye ai lailen ni hte mung hpring nga ra ga ai. Yawng, Jubali a shaman chyeju hpe hpring tsup hkra hkam la lu myit ga law. Karai Kasang shaman ya u ga! nga nna Jubilee mungga tsun lai wa sai.
March 25,2025 shani shatai ai Jau ningnan yan hta na Wa Jau Noel La Si Htang Bawm kanu yan kawa hte shi a dum nta masha ni yawng hpunau KBC hpung rai nna shi langai sha Kahtawlik nawku hpung shang nna jau tai wa ai re lam chye lu ai.
