Daini na Ja Chyum Mungga hpe hti sum ru yu ai shaloi e, Hpyen up hkang du a kasha hpe Yesu shamai ya ai lam hpe na la lu ga ai. Madu Yesu kaw sa wa ai up hkang du wa gaw, Ju amyu masha rai nga ai. Shi a kasha machyi ai majaw Yesu hpe sa shamai ya na matu saw shaga dat nga ai. Dai hpe Madu Yesu gaw shi a kasha machyi mai mat sai. Dai majaw dai du wa hpe nta de wa na matu tsun dat nu ai. Dai gaw dai du wa a kam sham myit hpe jep dinglik yu ai nan rai nga ai. Shi mung Madu Yesu a ga madat nna nta de wa mat ai. Hpang shani nta du wa yang shi a kasha gaw mai tsai taw nga ai hpe shi wa mu nu ai. Dai gaw shi Madu Yesu a ga hpe kam sham madat mara ai majaw rai nga ai.
Shing rai ndai du wa hta, Karai Kasang a mungga hta lai nna, kaga shi kaw madi madun na hpa mung n nga ai. Hpang jahtum e gaw, shanhte a htinggaw ting makam masham hpe hkap la kam sham mat wa sia rai nga ai. Shiga madat nu wa ni, anhte a kam sham myit hpe mung bai sumru dinglik yu ga. No.1 hku nna gaw, Madu Yesu a mungga hpe kam sham ra ga ai. Hpyen jaubu wa zawn, anhte mung madu a mungga hta kamsham ai myit nga ra ga ai. Madu Yesu a mungga gaw hpyen du wa hpe kam sham myit n`gun atsam ni jaw ya ai majaw, shi a matu sha n rai dum nta masha yawng hte kam sham ai masha ni byin tai mat wa sai rai nga ai. Dai zawn sha madu tsun da ai ja chyum mungga hpe kam sham let, mungga hte maren ta tut hkan sa nga ga law.
