Daini na Ja Chyum Mungga hpe hti sum ru yu ai shaloi e, Laban shani Madu Yesu ana ahkya shamai ya ai lam hpe na la lu ga ai. Myi n mu ai ni, lagaw n kaja ai ni, hkum katsing si ai masha ni law malaw gaw, Madu Yesu shamai shatsai ya na kam hpa let, hka nawng makau kaw ala nga ma ai. Dai ni kaw na (38) ning tup machyi hkrum nga ai wa gaw, Madu Yesu kaw na shamai ya na hpe kam hpa let ala nga ai raitim, kadai wa mung shi hpe n garum ya ma ai. Dai hpe Madu Yesu mu ai hte nang mai tsai mayu nni ngu san let, dai machyi ai wa hpe kalang ta shamai ya dat nu ai. Dai shani gaw laban ninghtoi shani rai nga ai.
Raitim mung laban ninghtoi gaw masha a matu re ngu ai hpe Madu Yesu sakse madun dat ai rai nga ai. Madu Yesu gaw machyi ai wa hpe shamai ya ai shaloi e, Rawt u na a yup ra hpe hpai let wa nu, ngu tsun dat ai hte rau, machyi ai wa gaw shi kamhpa ai myit hte mai tsai mayu ai majaw, madat mara let kalang ta rawt dat ai majaw, shamai shatsai mat lu nga ai. Shing rai dai madat mara ai gaw ahkyak la nga ai. Madu Yesu gaw, asak hpe jaw ya lu ai hpung dagu atsam rawng ai wa re. Anhte yawng mung yak hkak jam jau ai lapran kaw na e shi Madu hpe kam hpa myit n hten na gaw ra nga ga ai. Shi Madu a ga ni hpe hkan sa shatup na, madat mara chye na, kam sham myit ngang kang na mung grai ahkyak la nga ai re.
