Daini na Ja Chyum Mungga hpe hti sum ru yu ai shaloi e, Karai Kasang a kasha a magam bungli ni a lam ni hpe na la lu ga ai. Mani na kabu gara shiga hta, laban shani Yesu ana ahkya shamai ya sai hpe na la lu ai hte maren, Yesu hpe mara tam nga ma ai. Chyum laika hpe atsawm hti yu ga nga yang, shamai shatsai ya ngut ai hpang she dai shani gaw laban shani re ai hpe chye ai re. Raitim Madu Yesu gaw laban shani re n re hpe shi ahkyak n la ai. Masha hpe tsawra myit madun na matu shani ahkying aten ni n tam ai. Dai ni gaw ahkyak mung n re lam Yesu madun dan nga ai. Madu Yesu kaw e galaw sa na ahkaw ahkang mung tup hkrak lu ai wa nan re.
Kawa Karai Kasang galaw ai hte maren kasha Karai Kasang mung galaw ai. Dai gaw kawa hte kasha Karai Kasang gaw matut manoi rai nga ai hte maren re, arau sha nga nga ai majaw tsi shamai ya lu ai zawn galaw sa na ahkaw ahkang hpe mung lu ai re. Dai majaw Madu Yesu a matu gaw aten ninghtoi ni lata n ra ai. Laban shani hta raitim Karai Kasang gaw masha ni a matu mai kaja ai lam hpe galaw mai nga ai. Shingrai, laban ninghtoi hta Karai Kasang hpe grau nna, mayit maju jung nga na, tinang a prat hta Karai Kasang hpe shara jaw ga. Shi madu anhte hpe bau sin nga na gaw ahkyak la nga ai.
