Wa Sarabyin kawn Sudan Mungdan Hta Byin Nga Ai “Myit Npyaw Hpa Shinggyim Nauna Tsim-Yam Hte Seng Nna Garum Matum Lam ”  Galaw Nga Ai Hpe Aja Wa Tsun Shadum Dinglun Lai Wa Ai Shiga.

Wa Sarabyin Francis a Laban shani na Angelus hta alak mi hku nna Mungkan ting simsa wa na matu kyu hpyi ya nga ai hte grau nna ya ten hta Masha shada da karum matsan dum hkat ai lam nnga ai ndai mayak tsin-yam hpe grai sawng ai hku hkrum sha nga ai Sudan mungdan hte Myanmar mungdan a matu kyu hpyi ya nga ai hte,  ndai lusha gam ladaw (lent) hta anhte yawng a matu shamai shatsai la ai ten rai na hpe myit mada nga ai hpe The Holy See Press  Rung kawn ndau shana ya lai wa ai.The Holy See Press Office kawn Vatican kaw Jubille lamang ni hpe galaw nga ai raitim Wa Sarabyin Francis a Lusha gam ladaw laban Mali a Angelus hpe March 30 ya Laban shani ndau shana ya lai wa ai hpe chye lu ai.

Wa Sarabyin kawn dai shani e hti ang ai Luke a kabu gara shiga hta tsun shadum da ai hte maren kam sham ai kashu kasha ni anhte hpe nnan bai shamai ya ai aten re ai zawn sak hkrung hkawm sa na matu aja wa tsun shadum da lai wa ai.“Ngai mung maren sha nye a hkum hte wenyi hta dai zawng sha hkam sha nga ai” hpe tsun lai wa ai.Wa Sarbyin kawn matut nna “ya na zawn jam jau hkrum nga ai ni hpe hkye mawoi ai lam hpe galaw nga ai hta shang lawm nga ai ni hpe” myit kraw kata kaw nna grai chyeju dum ai lam tsun let, ngut nna ngup ga hku, tinang a myit nyan hku, akyu hpyi ai hte tsawra matsan dum ai lam ni hku nna anhte a makau grup yin na htingbu ni hpe shamai shatsai ya ai lam hpe galaw ya ai lam ni rai nga ai hpe tsun lai wa ai. Anhte ni yawng gaw “gawng kya nga ai hte machyi makaw lam ni hpe” hkrum sha nga ai ni hkrai rai nga ai, raitim mung yawng hta grau nna “anhte hpe Madu Yesu jaw da lai wa sai hkye hkrang la ai lam hta anhte ni yawng gaw Kahpu kanau ni hkrai” rai nga ga ai hpe tsun shadum lai wa ai.

Wa Sarabyin kawn kam sham ai hpung masha ni hpe majan a majaw tatut jam jau hkrum sha nga ai shara ni hkan sa du karum ai hte shi hte rau majan lawan simsa wa na matu akyu hpyi ai lam hta shang lawm na matu mung saw shaga lai wa ai.Alak mi hku nna majan tsin-yam hpe hkrum sha nga ai Ukraine, Palestine, Israel, Lebanon, The Democratic Republic of Congo and Myanmar mung ni hta lawan simsa wa na matu Kyu hpyi ya nga ai lam tsun lai wa ai. Alak mi hku nna Myanmar mung na Mandalay kaw 7.7 magnitute n-gun kaba hte nnang nawn kaba byin lai wa ai a majaw masha 1700 jan n ga si hkrum mat ai, matut nna Thai mungdan kaw mung masha law law si hkrum nna mat taw nga ai masha ni mung Mungdan lahkawng hta grai naw law nga ai hpe na chye lu nngai.Matut nna Wa Sarabyin kawn South Sudan a lam hpe grai myit tsang nga ai hpe mung tsun lai wa ai.Wa Sarabyin kawn Mungdan kata e shada da ja hkat taw nga ai manghkang ni hpe lawan dik nem mat hkra galaw na matu seng ang ai ningbaw ningla ni shang lawm na hpe akoi anoi hpyi lajin lai wa let, anhte shada da nbung ai lam ni hpe jahkring mi tawn da nna, anhte a lit ngu nna gwi gwi man hkrum di let gaja ai maga hku hkrum shaga jahkrum bawng ban ai hpawng hta shang lawm na hpe tsun lai wa ai.

“Ndai zawng re ai ladat hku” hkawm sa yang she “beloved Sudan na masha ni a mayak hkrum sha nga ai lam yawm mat ai hte simsa ai hte atsawm rai bai hkawm sa lu ai mungdan byin wa na re hpe tsun lai wa ai.Wa Sarabyin kawn kahtap nna Sudan hta byin nga ai majan hpe “Mara n nga ai mayak tsin yam”matut nna hpyi shawn nga ai lam re hpe myit dum shangun nga ai hpe tsun lai wa ai. Ndai zawn re ai tsin-yam mabyin hte seng nna Wa Sarabyin kawn seng ang ai ningbaw ningla ni hpe tinang a kahpu kanau ni a shim lum hkru kat na lam hte matut nna hkam jan lu hkra myit tau galaw ya na matu aja wa tsun shadum let, matut nna ngang kang ai mahtai hpe lu na matu shada jahkrum bawng ban ai lam ni hpe lawan dik ai hku galaw lu na hpe myit mada nga ai lam tsun lai wa ai.Wa Sarabyin kawn mungkan ting na wuhpung wuhpawng ni hpe “masha shada da karum matsan dum ai lam n nga ai mayak lam hpe” hparan ai lam hpe grau grau nna atsam dat n-gun dat rai galaw sa wa lu na matu aja wa tsun shadum lai wa ai.

Wa Sarabyin kawn Tajikistan hte Kyrgyzstan mung jarit masat ai (boarder) lam hpe masan sa ai hku jahkrum bawng ban la lu ai majaw Karai Kasang hpe chyeju dum ai hte ndai mabyin gaw anhte a matu kaja ai daw dan lam rai nga ai hpe tsun lai wa ai. “Matut nna ndai zawn  sha hkawm sa na matu Mungdan lahkawng hpe” n gun jaw tsun lai wa ai.Wa Sarabyin Francis gaw dai shani na Laban mungga hpe “Matsan dum lama ai Nu Maria e, shinggyim dinghku nta masha ni hpe ngwi pyaw simsa nga lu na matu hpyi htinglu htinglai ya rit” ngu nna akyu hpyi let shangun lai wa ai.