Daini na Ja Chyum Mungga hpe hti sum ru yu ai shaloi e, Yesu a mungga na tim mung n kam sham ma ai lam hpe na lu ga ai. Dai ni chyum laika hta e sakse hkam ai ngu ai ga si hpe ya sha ya sha na lu na ga ai. Sakse hkam ai ngu ai gaw marai langai ngai a tsun shaga galaw sa ai sat lawat lai ladat ni hpe e jaw ai shut ai ngu ai hpe shangang shakang ai lam re. Shut ai rai yang e mung, shut ai lam sakse madun ra ai. Bai teng ai jaw ai rai yang e mung, jaw ai lam sak se hte madun dan ra nga ai. Dai zawn sha kawa Karai Kasang gaw kasha Karai Kasang hpe sak se hkam ya ai. Bai kasha Karai Kasang mung, kawa Karai Kasang hpe sak se hkam ya nga ai.
Dai zawn sha Madu Yesu a shawng na kasa wa Yawhan Baptista mung, Madu Yesu a lam hpe shawng sak se hkam ya sai rai nga ai. Raitim Madu Yesu a sakse hkam ai lam gaw, grau nna ngang kang dingman nga lu ai. Galu kaba ai lam nga ai. Shi a galaw ai sat lawat gaw jaw ai ngang kang nga ai. Dai majaw anhte mung Karai Kasang a kashu kasha ni re ai lam hpe ta tut hta mai kaja ai amu ni galaw let, n-gup aga ni hte mung sakse hkam sa nga ga law.
