Hkamja lam n nga, machyi makaw hkrum ai ni, machyi masha ni hpe tsi tsi ya, yu gawn lajang ya taw ai ni a Jubilee Missa hpe 5 April 2025 ya jahpawt Yangon Sasana na St. Jude Nawku jawng hta Yangon Saradaw kaba Cardinal Charles Bo woi awn galaw la lu sai. Missa hkungga hta Wa Sarabyin a dat kasa, Msgr. Andrea Farrente mung sa du shang lawm ai.
Jubilee Missa hta asak kaba nna hkamja lam n nga ai ni, machyi makaw byin ai ni, machyi masha ni hpe tsi tsi, gawn lajang ya nga ai ni hte hkamja dap magam gun ni law law sa lawm ai hpe mu lu ai.
Missa Hkungga hta machyi makaw hkrum nga ai ni a matu, Nnang nawn tsinyam hkrum sha nga ai ni a matu, hpyen yen tsinyam hkrum masha ni a matu, hkamja dap magam gun tsi Sara, Sarama ni a matu, machyi makaw byin ai masha ni hpe yu gawn lajang ya nga ai ni a matu, Myanmar mungdan ngwi pyaw simsa wa na matu laksan akyu hpyi ya ai.
Missa hkungga ngut ai hpang, hkamja lam n nga, machyi makaw hkrum ai ni hpe hkamja lam sau chya ya ai lam galaw ai.
Nawku jawng wang kata tsi gawk gan hpaw da nna tsi jep, tsi tsi hkam la mayu ai ni hpe tsi jep ya ai, tsi tsi ya ai lam mung galaw la lu sai.
Jubilee a shaman chyeju hpe yawng hkam la lu mu ga!
Shiga – Julia Ja Ing
